وزیر دفاع خواجہ آصف نے انکشاف کیا ہے کہ سابق آرمی چیف جنرل (ر) قمر جاوید باجوہ نے فیلڈ مارشل سید عاصم منیر کی تعیناتی کو روکنے کے لیے دباؤ ڈالا اور یہاں تک کہ دھمکیاں بھی دیں۔ ان کے مطابق جنرل باجوہ پہلے فیض حمید کو آرمی چیف بنوانا چاہتے تھے، اور ناکامی پر دیگر نام تجویز کیے۔
خواجہ آصف نے کہا کہ ماضی میں کبھی بھی آرمی چیف کی تقرری کے حکومتی اختیار کو اس طرح چیلنج نہیں کیا گیا تھا۔
انہوں نے مزید الزام عائد کیا کہ 9 مئی کے واقعات ایک منظم منصوبہ تھے، جن میں فیض حمید اور پی ٹی آئی شامل تھے، اور ان واقعات کا مقصد فیلڈ مارشل عاصم منیر کی تعیناتی کو پلٹنا تھا۔
خواجہ آصف کا کہنا تھا کہ 9 مئی کا واقعہ بانی پی ٹی آئی تنہا نہیں کرسکتےتھے، فیض حمید کےخلاف مزید مقدمات بننے کی گنجائش ہے، فیض حمید کے رابطے تھے اور ریٹائرمنٹ کے باوجود نبض ان کے ہاتھ میں تھی۔
