پاکستان نے بھارت میں بابری مسجد کی جگہ رام مندر پر پرچم لہرانے پر گہری تشویش کا اظہار کیا ہے۔ ترجمان دفتر خارجہ نے وفاقی دارالحکومت سے جاری بیان میں کہا کہ بھارت میں بڑھتے ہوئے اسلاموفوبیا پر عالمی برادری فوری نوٹس لے۔
دفتر خارجہ کے مطابق بابری مسجد صدیوں پرانی عبادت گاہ تھی، جسے انتہا پسندوں نے 6 دسمبر 1992ء کو منہدم کر دیا تھا، اور بعد میں بھارتی عدالت نے ان افراد کو بری کر دیا۔
اس کے بعد بھارتی حکومت نے منہدم شدہ مسجد کی جگہ رام مندر کی تعمیر کی اجازت دی۔
ترجمان نے خبردار کیا کہ بھارت میں دیگر تاریخی مساجد بھی اس قسم کی بے حرمتی کے خطرات کا سامنا کر رہی ہیں اور یہ امتیازی رویہ اقلیتوں کے ساتھ برتاؤ کے بارے میں بہت کچھ ظاہر کرتا ہے۔
دفتر خارجہ نے کہا کہ بھارتی مسلمانوں کو سماجی، معاشی اور سیاسی پسماندگی کا سامنا ہے، اور عالمی برادری کو بھارت میں اقلیتوں کے خلاف نفرت انگیز تقاریر اور حملوں کے خلاف آواز بلند کرنی چاہیے۔
ترجمان نے مزید کہا کہ اقوام متحدہ بھارت کے اندر اسلامی ورثے کے تحفظ کو یقینی بنائے اور ہندوستانی مسلمانوں سمیت تمام مذہبی برادریوں کا تحفظ یقینی بنایا جائے۔
