ڈسٹرکٹ اینڈ سیشن کورٹ نے 9 مئی اور دیگر مقدمات میں پاکستان تحریکِ انصاف کے بانی عمران خان اور بشریٰ بی بی کی ضمانت میں توسیع کر دی۔ اسلام آباد کے ایڈیشنل ڈسٹرکٹ اینڈ سیشن جج محمد افضل مجوکہ نے 9 مئی اور دیگر پانچ مقدمات کی سماعت کی۔
دورانِ سماعت، عمران خان کی عدم موجودگی کے باعث ضمانت کی درخواستوں پر دلائل نہیں ہو سکے، اور عدالت نے اگلی سماعت میں بانی پی ٹی آئی کو عدالت میں یا بذریعہ ویڈیو لنک پیش کرنے کی ہدایت کی۔
سماعت کے بعد عدالت نے عمران خان اور بشریٰ بی بی کی ضمانت قبل از گرفتاری میں توسیع کرتے ہوئے دونوں کو 23 دسمبر تک گرفتار کرنے سے روک دیا۔ بعد ازاں عدالت نے ضمانت کی درخواستوں پر سماعت بھی 23 دسمبر تک ملتوی کر دی۔
واضح رہے کہ عمران خان کےخلاف 9 مئی، اقدام قتل، جعلی رسیدوں سمیت دیگرمقدمات درج ہیں جب کہ بشریٰ بی بی کےخلاف مبینہ جعلی رسیدیں جمع کروانے پرمقدمہ درج ہے۔
