قومی اسمبلی کا اجلاس اسپیکر سردار ایاز صادق کی سربراہی میں جاری ہے، جس میں آج 27ویں آئینی ترمیم مختلف ترامیم کے ساتھ منظور ہونے کا امکان ہے۔ ذرائع کے مطابق، سینیٹ میں 27ویں آئینی ترمیم میں ایک تکنیکی غلطی سامنے آئی تھی، جس کے باعث قومی اسمبلی سے منظوری کے بعد ترمیم دوبارہ سینیٹ کو بھجوائے جانے کا امکان ہے۔
بتایا جا رہا ہے کہ کل سینیٹ سے 27ویں آئینی ترمیم کی دوبارہ منظوری لی جائے گی۔
دوسری جانب، متحدہ اپوزیشن نے آج بھی قومی اسمبلی کے اجلاس کے دوران 27ویں آئینی ترمیم کے خلاف احتجاج کیا اور ترمیم کو مکمل طور پر مسترد کر دیا۔
اس موقع پر اسپیکر ایاز صادق نے ایک بار پھر اپوزیشن کو مذاکرات کی دعوت دیتے ہوئے کہا کہ وہ بحیثیت اسپیکر، حکومت اور اپوزیشن کے درمیان مذاکرات کی سہولت کاری کے لیے تیار ہیں۔
انہوں نے کہا “جب حکومت اور اپوزیشن آپس میں بیٹھیں گے تو معاملات کا حل نکل آئے گا۔”
یاد رہے کہ دو روز قبل سینیٹ نے 27ویں آئینی ترمیم کو دو تہائی اکثریت سے منظور کیا تھا۔ اس ترمیم کے تحت ملک میں ایک آئینی عدالت قائم کی جائے گی جس میں تمام ہائیکورٹس کے ججز شامل ہوں گے۔
ترمیم کے مطابق صدرِ پاکستان کو تاحیات استثنیٰ حاصل ہوگا، جبکہ آرمی چیف کا عہدہ ختم کر کے چیف آف ڈیفنس فورسز کا نیا عہدہ تشکیل دیا جائے گا۔
گزشتہ روز وفاقی وزیر قانون اعظم نذیر تارڑ نے 27 ویں آئینی ترمیم قومی اسمبلی میں پیش کی تھی جس پر حکومت اور اپوزیشن اراکین کی جانب سے بحث بھی کی گئی تھی۔
