وزیرِ دفاع خواجہ آصف آج سینیٹ میں آرمی ایکٹ ترمیمی بل منظوری کے لیے پیش کریں گے، جس کے لیے اجلاس کا ایجنڈا بھی جاری کر دیا گیا ہے۔ ایجنڈے کے مطابق وزیر دفاع پاکستان ایئر فورس ایکٹ ترمیمی بل اور پاکستان نیوی آرڈیننس ترمیمی بل بھی ایوانِ بالا میں منظوری کے لیے پیش کریں گے۔
اسی اجلاس میں وزیرِ قانون اعظم نذیر تارڑ سپریم کورٹ پریکٹس اینڈ پروسیجر ترمیمی بل بھی منظوری کے لیے سینیٹ کے سامنے رکھیں گے۔
یہ تمام بل قومی اسمبلی سے منظوری کے بعد اب سینیٹ میں پیش کیے جا رہے ہیں۔
واضح رہے کہ قومی اسمبلی پہلے ہی آرمی ایکٹ 2025 کی منظوری دے چکی ہے، جو ستائیسویں آئینی ترمیم کے بعد منظور ہوا۔
نئے قانون کے مطابق آرمی چیف کے لیے بطور چیف آف ڈیفنس فورسز نیا نوٹیفکیشن جاری کیا جائے گا، جس کے بعد ان کی مدتِ ملازمت دوبارہ سے شروع ہوگی۔
ترمیمی ایکٹ میں یہ بھی شامل ہے کہ چیف آف ڈیفنس فورسز پاک فوج کے تمام شعبوں کی ری اسٹرکچرنگ اور انضمام کے ذمہ دار ہوں گے، جبکہ وزیراعظم ان کی سفارش پر کمانڈر نیشنل اسٹریٹیجک کمانڈ کی تعیناتی کریں گے۔
آرمی ایکٹ کے مطابق کمانڈر نیشنل اسٹریٹیجک کمانڈ کی مدت ملازمت 3 سال ہو گی، کمانڈر نیشنل اسٹریٹیجک کمانڈ کو 3 سال کے لیے دوبارہ تعینات کیا جا سکے گا۔
آرمی ایکٹ میں کہا گیا ہے کہ 27 نومبر سے چیئرمین جوائنٹ چیفس آف اسٹاف کمیٹی کا عہدہ ختم ہو جائے گا۔
