اسلام آباد کی ڈسٹرکٹ اینڈ سیشن کورٹ نے پولیس کو 9 مئی سمیت 5 مقدمات میں بانی پی ٹی آئی عمران خان کی گرفتاری سے روک دیا ہے۔ بانی پی ٹی آئی کے خلاف مختلف مقدمات درج ہیں جن میں 9 مئی کے واقعے، اقدام قتل، اور جعلی رسیدوں کے الزامات شامل ہیں۔ جبکہ بشریٰ بی بی کے خلاف بھی مبینہ جعلی رسیدیں جمع کروانے کا مقدمہ درج ہے۔
یہ کیسز ڈسٹرکٹ اینڈ سیشن کورٹ اسلام آباد کے جج افضل مجوکہ کی عدالت میں زیر سماعت آئے۔
عدالت نے بانی پی ٹی آئی عمران خان اور بشریٰ بی بی کی ضمانت قبل از گرفتاری میں توسیع کرتے ہوئے متعلقہ مقدمات میں دونوں کی گرفتاری کو 25 نومبر تک روک دیا۔
ڈسٹرکٹ اینڈ سیشن کورٹ اسلام آباد نے اگلی سماعت میں عمران خان کو عدالت میں یا بذریعہ ویڈیو لنک پیش کرنے کی ہدایت کرتے ہوئے ضمانت کی درخواستوں پر سماعت 25 نومبر تک ملتوی کردی۔
