راولپنڈی کی انسدادِ دہشت گردی عدالت نے علیمہ خان کی مسلسل عدم پیشی پر ایک بار پھر ناقابلِ ضمانت وارنٹ گرفتاری جاری کر دیے۔ جج امجد علی شاہ نے 26 نومبر کے احتجاج کے مقدمے کی سماعت کی، جس میں علیمہ خان سمیت 11 ملزمان نامزد ہیں۔
سماعت کے دوران علیمہ خان ایک بار پھر عدالت میں پیش نہ ہوئیں، جب کہ ان کی جانب سے کوئی وکیل بھی حاضر نہ ہوا۔
استغاثہ کے 5 گواہان اور دیگر 10 ملزمان عدالت میں موجود تھے، جبکہ اسپیشل پراسیکیوٹر ظہیر شاہ اپنی ٹیم کے ہمراہ پیش ہوئے۔
عدالت نے علیمہ خان کی غیر حاضری پر برہمی کا اظہار کرتے ہوئے پانچویں مرتبہ ناقابلِ ضمانت وارنٹ گرفتاری جاری کر دیے اور کیس کی سماعت 30 اکتوبر تک ملتوی کر دی۔
واضح رہے کہ علیمہ خان کاشناختی کارڈ، پاسپورٹ اوربینک اکاؤنٹس پہلےہی بلاک کرنےکا حکم جاری ہوچکا ہے اور عدالت نے نادرا، پاسپورٹ امیگریشن سمیت اسٹیٹ بینک سے رپورٹ طلب کررکھی ہے۔
