وٹامن ڈی کی کمی صحت کے متعدد مسائل کا سبب بن سکتی ہے، اور عالمی سطح پر اس کمی کے واقعات میں تیزی دیکھی جا رہی ہے۔ جاپان میں کی جانے والی حالیہ تحقیق میں انکشاف ہوا ہے کہ وٹامن ڈی کی کمی کو پورا کرنے والی سپلیمنٹس لینے سے ٹائپ ٹو ذیابیطس کے خطرے میں کمی آتی ہے۔
طبی جریدے بی ایم جے میں شائع تحقیق کے مطابق، 1256 افراد پر تین سال تک کی جانے والی تحقیق سے معلوم ہوا کہ جو لوگ وٹامن ڈی کی کمی کو پورا کرنے کے لیے سپلیمنٹس استعمال کرتے ہیں، ان میں نہ صرف ذیابیطس ٹائپ ٹو کا خطرہ کم ہوتا ہے بلکہ انسولین کی سطح بھی بہتر رہتی ہے۔
تحقیق کے دوران رضاکاروں کو دو گروپوں میں تقسیم کیا گیا۔ ایک گروپ کو روزانہ وٹامن ڈی کی کم مقدار فراہم کی گئی، جبکہ دوسرے گروپ کو صرف سادہ گلوکوز دیا گیا۔
ماہرین نے ہر تین ماہ بعد رضاکاروں کے باڈی ماس انڈیکس اور دیگر صحت کے مختلف ٹیسٹ کیے، جن میں ذیابیطس کی جانچ بھی شامل تھی۔
نتائج سے معلوم ہوا کہ وٹامن ڈی کی سپلیمنٹس استعمال کرنے والے افراد میں ٹائپ ٹو ذیابیطس کے ہونے کے امکانات 11 فیصد کم تھے۔
تحقیق میں شامل ماہرین کے مطابق اگرچہ وٹامن ڈی کی کمی کے شکار افراد اور وٹامن ڈی کے سپلیمینٹ لینے والے افراد کے نتائج میں کوئی بہت بڑا نمایاں فرق نہیں تھا، تاہم یہ دیکھا گیا کہ سپلیمینٹ لینے والے افراد میں ذیابیطس ٹائپ ٹو سے متاثر ہونے کے امکانات کم ہوتے ہیں۔
ماہرین نے تجویز دی کہ ذیابیطس ٹائپ ٹو سے بچنے کے لیے لوگ وٹامن ڈی کے سپلیمینٹس لے سکتے ہیں۔
