راڈوے کی معروف اداکارہ امانی ڈایا اسمتھ قاتلانہ حملے میں ہلاک ہو گئیں۔ پولیس نے ان کے بوائے فرینڈ کو گرفتار کر لیا۔
غیر ملکی خبر رساں ایجنسی کے مطابق براڈوے کی 25 سالہ معروف اداکارہ امانی ڈایا اسمتھ اسٹیج پر پیش کی جانے والی فلم دی لائن کنگ میں ینگ نالا کے کردار سے شہرت رکھتی تھیں۔ انہیں نیو جرسی میں اپنے رہائشگاہ پر چاقو کے وار سے قتل کر دیا گیا۔
مڈل سیکس کاؤنٹی پراسیکیوٹر آفس کے مطابق اتوار کی صبح 9 بج کر 18 منٹ پر گروو ایونیو پر واقع ایک رہائش گاہ میں چاقو سے حملے کی اطلاع پر 911 کال موصول ہوئی۔ پولیس موقع پر پہنچی تو امانی اسمتھ کو شدید زخمی حالت میں پایا گیا۔ انہیں فوری طور پر رابرٹ وُڈ جانسن یونیورسٹی اسپتال منتقل کیا گیا۔ جہاں وہ زخموں کی تاب نہ لاتے ہوئے دم توڑ گئیں۔
پولیس نے مقتولہ کے 35 سالہ بوائے فرینڈ جارڈن ڈی جیکسن اسمال کو گرفتار کر لیا۔ پراسیکیوٹر آفس کے مطابق امانی اسمتھ اور جارڈن ایک دوسرے کو پہلے سے جانتے تھے۔ اس لیے یہ واقعہ کسی اتفاقی تشدد کا نتیجہ نہیں تھا۔
ابتدائی تفتیش کے بعد جارڈن جیکسن اسمال کو بغیر کسی مزاحمت کے گرفتار کیا گیا۔ ان پر فرسٹ ڈگری قتل، سیکنڈ ڈگری بچے کی فلاح کو خطرے میں ڈالنے، تھرڈ ڈگری غیر قانونی مقصد کے لیے ہتھیار رکھنے اور فورتھ ڈگری غیر قانونی طور پر ہتھیار رکھنے کے الزامات عائد کیے گئے ہیں۔
امانی اسمتھ کے پسماندگان میں ان کا 3 سالہ بیٹا، والدین، دو کم عمر بہن بھائی اور دیگر قریبی رشتہ دار شامل ہیں۔ خاندان نے گوفنڈ می پر ایک فنڈ ریزنگ مہم شروع کی ہے۔ جس کے تحت 25 دسمبر تک 50 ہزار ڈالر سے زائد رقم جمع ہوچکی۔
فنڈ ریزنگ سے حاصل ہونے والی رقم تدفین و یادگاری اخراجات، جائے وقوعہ کی صفائی۔ خاندان کے لیے نفسیاتی علاج، قانونی و انتظامی اخراجات، اور امانی کے بیٹے اور پالتو کتے کی آئندہ دیکھ بھال کے لیے استعمال کی جائے گی۔
واضح رہے کہ امانی اسمتھ کی والدہ فلم انڈسٹری میں ہیئر ڈریسر کے طور پر کام کرتی ہیں۔
