پاکستانی شوبز کے اداکار فیروز خان کی اہلیہ، ڈاکٹر زینب فیروز، کے حالیہ بیان نے سوشل میڈیا پر نئی بحث کو جنم دے دیا ہے۔ ماہرِ نفسیات ڈاکٹر زینب نے حال ہی میں گھریلو تشدد کے خلاف ایک سوشل میڈیا پوسٹ میں اپنی رائے کا اظہار کیا۔
جس میں انہوں نے واضح طور پر کہا کہ تشدد کبھی بھی محبت کی علامت نہیں ہو سکتا اور کسی بھی خاتون کو اپنی عزتِ نفس سے سمجھوتہ نہیں کرنا چاہیے۔
یہ بیان ایسے موقع پر سامنے آیا جب سوشل میڈیا پر ڈاکٹر نبیہ علی خان کی ایک ویڈیو وائرل ہوئی تھی، جس میں وہ گھریلو تشدد کو جائز قرار دینے کی کوشش کر رہی تھیں۔
ڈاکٹر زینب کے اس بیان کو اس ویڈیو کے بیانیے کی سخت مخالفت کے طور پر دیکھا گیا۔
تاہم، سوشل میڈیا صارفین نے اس کے بعد فیروز خان کی اہلیہ پر ان کے شوہر کے ماضی کے حوالے سے بھی تنقید کی۔
بعض صارفین نے کہا کہ ڈاکٹر زینب کو سب سے پہلے یہ نصیحت اپنے شوہر کو دینی چاہیے جو اپنی سابقہ اہلیہ پر تشدد کر چکے ہیں۔
کچھ نے ان پر یہ الزام بھی عائد کیا کہ انہوں نے اپنے مریض سے شادی کرکے پیشہ ورانہ ضابطے کی خلاف ورزی کی۔ سوشل میڈیا صارفین نے یہ بیان فیروز خان کی امیج کو بہتر بنانے کی کوشش بھی قرار دیا۔
