چینی گلوکارہ وکی کی جانب سے پاکستانی گانے ’بوہے باریاں‘ کی دلکش پرفارمنس پر گلوکارہ حدیقہ کیانی نے ان کی گائیکی کو سراہا اور بھرپور تعریف کی۔
سوشل میڈیا پر وائرل ہونے والی اس ویڈیو نے صارفین کی توجہ حاصل کر لی ہے اور پاکستان و چین کی دوستی کی ایک خوبصورت جھلک پیش کی ہے۔
یہ ویڈیو پاکستان کے 75ویں یوم آزادی کے موقع پر بیجنگ میں پاکستانی سفارتخانے کے زیر اہتمام ثقافتی اور روایتی کھانوں کے فروغ کے لیے منعقدہ تقریب سے لی گئی ہے۔
ویڈیو میں چینی گلوکارہ وکی اپنی خوبصورت آواز میں گلوکارہ حدیقہ کیانی کا مقبول گانا ’بوہے باریاں‘ گنگنا رہی ہیں۔
View this post on Instagram
حدیقہ کیانی نے بھی اس ویڈیو پر تبصرہ کرتے ہوئے لکھا کہ یہ وکی ہے، ایک بہت باصلاحیت چینی گلوکارہ اور پاکستانی ثقافت کی سچی پرستار اور حامی۔
حدیقہ کیانی کے مطابق، انہوں نے برسوں پہلے وکی کے ساتھ پرفارم کیا تھا اور انہیں دل سے گانا گاتے دیکھ کر بہت خوشی ہوئی ہے۔
خیال رہے کہ حدیقہ کیانی نے ’بوہے باریاں‘ 1999 میں ریلیز کیا تھا، یہ گانا ان کے ایلبم ’روشنی‘ میں شامل تھا، جو ان کے مقبول ترین گانوں میں شمار ہوتا ہے۔
