بچپن سے کرکٹ کھیلنے کی شوقین، خاندان اور سماجی مسائل کا ڈٹ کر مقابلہ کرنے والی لڑکی کی کہانی پر مبنی فلم ’نایاب‘ کا کراچی میں ستاروں سے سجی شام میں پریمیئر منعقد ہوا، یمنیٰ زیدی کی یہ پہلی فلم ہے۔
گزشتہ روز (25 جنوری کو ) فلم کے پریمیئر کے موقع پر ناقدین اور آڈیئنس نے فلم کو قابل ستائش قرار دیا اور اداکار یمنیٰ زیدی، اسامہ خان، جاوید شیخ اور دیگر کاسٹ اور سپورٹنگ اداکاروں کی اداکاری کو سراہا۔
فلم انڈسٹری میں پہلی بار قدم رکھنے والی اداکارہ یمنیٰ زیدی نے اپنے خیالات کا اظہار کرتے ہوئے پرجوش انداز میں کہا کہ ’یہ فلم بہت انٹرٹینمنٹ سے بھرپور، خوشی اور دکھ کے لمحات کے علاوہ ہر عنصر اس فلم میں موجود ہے‘۔
’نایاب‘ میں یمنیٰ زیدی نایاب نامی مرکزی کردار میں دکھائی دے رہی ہیں جو کہ بچپن سے ہی کرکٹر بننا چاہتی ہیں لیکن خاندان اور سماجی مسائل کی وجہ سے اسے مشکلات درپیش آتی ہیں۔
فلم کے کردار نایاب کا تعلق صوبہ سندھ کے دارالحکومت کراچی سے ہوتا ہے اور فلم میں ان کے علاوہ جاوید شیخ، عدنان صدیقی، اسامہ خان اور محمد فواد خان سمیت فریال محمود بھی دکھائی دیں گی۔
جاوید شیخ نے نایاب کے والد کا کردار ادا کیا ہے جہاں وہ نایاب کے کرکٹ کھیلنے کے خلاف ہیں جبکہ بھائی کا کردار محمد فواد خان نے ادا کیا ہے جہاں وہ کرکٹ اکیڈمی جوائن کرنے سے قومی ٹیم میں سلیکشن تک نایاب کا بھرپور ساتھ دیتے ہیں۔
قبل ازیں انہوں نے ایک انٹرویو میں بتایا تھا کہ انہوں نے کبھی کرکٹ نہیں کھیلی، انہوں نے گیند کیچ کی، نہ بلا تھاما لیکن فلم ’نایاب‘ کے لیے انہوں نے کرکٹ کھیلنا سیکھی۔
’نایاب‘ کی ہدایات عمیر ناصر علی نے دی ہیں جب کہ اسے رومینا عمر اور عمیر عرفانی نے پروڈیوس کیا ہے۔
فلم کی زیادہ تر شوٹنگ صوبہ سندھ کے دارالحکومت کراچی میں کی گئی ہے، تاہم اس کے متعدد مناظر لاہور سمیت دیگر شہروں میں بھی فلمائے گئے ہیں۔
یہ فلم آج (26 جنوری کو) ملک بھر کے سنیما گھروں میں ریلیز ہوچکی ہے، شائقین یہ فلم دیکھنے کے لیے اپنے قریبی سنیما گھروں کا رخ کرسکتے ہیں۔
