اسلام آباد:فیڈرل بورڈ آف ریونیو (ایف بی آر) نے ٹیکس فراڈ کیسز کی تحقیقات کے لیے اضافی اختیارات حاصل کر لیے ہیں۔
ایف بی آر کے مطابق اب انٹرنیٹ اور ٹیلی کام کمپنیوں کے ساتھ ساتھ پاکستان ٹیلی کمیونیکیشن اتھارٹی (پی ٹی اے) کو بھی معلومات فراہم کرنا لازمی ہوگا۔
اس اقدام سے کمشنرز کو ٹیکس فراڈ کی تحقیقات کے دوران انٹرنیٹ سبسکرائبرز کی تفصیلات حاصل کرنے میں آسانی ہوگی۔
ذرائع کے مطابق انٹرنیٹ سروسز کمپنی سے ڈیٹا جبکہ ٹیلی کام کمپنی یا پی ٹی اے سے صارفین کی معلومات حاصل کی جاسکیں گی۔
تحقیقات کیلئے آڈیٹرز کا تقرر بھی کیا جائے گا، ترمیمی قانون نجی کے تحت آڈیٹرز رجسٹرڈ افراد کے ڈیٹا کی رازداری یقینی بنانے کے پابند ہوں گے۔
سرکاری ملازمین ٹیکس دہندگان سے متعلق معلومات افشا نہ کرنے کے پہلے ہی پابند ہیں۔
بورڈ یا کمشنر مقدمات یا ویلیوایشن میں معاونت کیلئے ماہرین کا تقرر کرے گا، اس کا مقصد ٹیکس امور میں کام کے معیار بہتر بنانا ہے۔
