جنوبی امریکی ملک برازیل کی مصروف شاہراہ پر طیارہ گر کر تباہ ہوگیا، خوفناک حادثے میں پائلٹ اور مسافر معجزانہ طور پر بچ گئے۔
بین الاقوامی میڈیا رپورٹس کے مطابق ایک چھوٹا طیارہ بے قابو ہو کر گاوبیروبا شہر کی مصروف شاہراہ پر جا گرا لیکن خوش قسمتی سے اس خوفناک حادثے میں کوئی گاڑی اور راہ گیر زد میں نہیں آئے۔
حادثے کی سی سی ٹی وی فوٹیج میں دیکھا جا سکتا ہے کہ ایک چھوٹا طیارہ سڑک پر گرنے سے تباہ ہو گیا اور اس کے قریب سے گزرنے والی گاڑیاں اور راہ گیر محفوظ رہے۔
راہ گیروں نے فوری طور پر پائلٹ اور مسافر کو زخمی حالت میں ریسکیو کر کے اسپتال منتقل کیا جہاں ان کی حالت خطرے سے باہر بتائی جاتی ہے۔
طیارہ آزمائشی پرواز پر تھا اور مبینہ طور پر انجن میں خرابی کی وجہ سے حادثے کا شکار ہوا۔ طیارہ ایمرجنسی لینڈنگ کی کوشش کررہا تھا اور اسی اثنا میں وہ بے قابو ہوگیا اور تاروں سے ٹکرا گیا۔
پائلٹ نے طیارے کو پوری کوشش کے بعد چلتی گاڑیوں اور راہ گیروں سے دور رکھ کر قیمتی جانی نقصان سے بچا لیا۔
