پورے ملک میں واٹس ایپ کو بند کرنے کا فیصلہ

رپورٹس کے مطابق، روسی انتظامیہ نے واٹس ایپ کو آن لائن ڈائریکٹری سے نکال دیا ہے، جس کے بعد اسے مؤثر انداز سے روسی انٹرنیٹ سے بلاک کر دیا گیا ہے۔ روسی حکومت کا کہنا ہے کہ وہ چاہتی ہے کہ صارفین ایک مقامی میسجنگ ایپ "میکس" پر منتقل ہو جائیں، جو وی چیٹ ایپ کی طرح ہے، لیکن اس میں اینڈ ٹو اینڈ انکرپشن کا تحفظ نہیں ہے۔

میٹا نے ایک بیان میں کہا کہ روسی حکومت کا مقصد 10 کروڑ سے زائد واٹس ایپ صارفین کو محفوظ کمیونیکیشن سے محروم کرنا ہے، جس سے روسی عوام کو حاصل تحفظ میں کمی آئے گی۔ میٹا نے یہ بھی کہا کہ روسی حکومت نے واٹس ایپ کو مکمل طور پر بلاک کرنے کی کوشش کی ہے تاکہ صارفین کو حکومت کی نگرانی والی ایپ میں منتقل کیا جا سکے۔

اسی دوران، روسی حکومت نے 11 فروری کو ٹیلیگرام کو بھی آن لائن ڈائریکٹری سے نکال دیا، اور میٹا کی دیگر ایپس فیس بک اور انسٹاگرام تک رسائی بھی مکمل طور پر بند کر دی ہے۔ رپورٹوں کے مطابق، یوٹیوب پر بھی پابندی عائد کی گئی ہے، تاہم یہ واضح نہیں ہے کہ اسے بھی مکمل طور پر آن لائن ڈائریکٹری سے باہر کیا گیا ہے یا نہیں۔

یاد رہے کہ جولائی 2025 میں روسی پارلیمان کے ایک رکن نے کہا تھا کہ واٹس ایپ پر پابندی عائد کرنے کا امکان بہت زیادہ ہے، اور روسی حکومت نے اس حوالے سے اپنی پالیسی مزید سخت کرنے کی منصوبہ بندی کی ہے۔