مودی کے بھارتی جنگی جرائم عالمی سطح پر بے نقاب ہو گئے، دہلی بم دھماکہ کے بعد مقبوضہ کشمیر بھارتی بربریت کی زد میں ہے۔ بھارت میں جنگی جرائم ایک معمول بنتے جا رہے ہیں۔ دہلی بم دھماکہ کے چند دن بعد ہی مقبوضہ کشمیر میں مکانات مسمار کرنے کا واقعہ سامنے آیا، جسے بین الاقوامی نشریاتی ادارے ٹی آر ٹی نے عالمی سطح پر اجاگر کیا ہے۔
ٹی آر ٹی کی رپورٹ کے مطابق، دہلی دھماکے کے تین دن بعد بھارت نے جنوبی کشمیر میں محض الزام کی بنیاد پر ایک گھر دھماکہ سے مسمار کر دیا۔
رپورٹ میں کہا گیا ہے کہ بھارتی حکومت ظلم و استبداد کے ذریعے کشمیر کے مسائل کو عالمی تنازعے کے بجائے اندرونی معاملہ قرار دے کر جنگی جرائم چھپانے کی کوشش کر رہی ہے۔
2019 سے غیر قانونی حراستیں، رابطوں کی بندش اور خوف کی سیاست بھارتی حکمرانی کے اہم اوزار بن چکے ہیں۔
رپورٹ میں یہ بھی بتایا گیا ہے کہ ان لائف ایکٹیویٹیز (پریوینشن) ایکٹ کے تحت بھارتی قوانین نے سیاسی اظہار رائے کو جرم قرار دیا ہے۔
سیاسی اختلاف اب صرف قید تک محدود نہیں، بلکہ کشمیری خاندانوں کے مکانات مسمار کیے جانے اور جائیداد ضبط کرنے کا سبب بھی بن رہے ہیں۔
2020 سے 2024 تک بھارتی فوج کی کارروائیوں سے 1,172 شہری مکانات جزوی یا مکمل طور پر متاثر ہوئے، جن کی تفصیلات دستاویزی شکل میں جمع کی گئی ہیں۔
ٹی آر ٹی کی رپورٹ میں کہا گیا ہے کہ پہلگام حملے کے بعد عالمی قوانین کی خلاف ورزی کرتے ہوئے بھارتی فورسز نے شبہات کی بنیاد پر کشمیریوں کے متعدد مکانات مسمار کیے، جبکہ بھارتی ارکان پارلیمنٹ نے بھی شہری گھروں پر بمباری کی کھلے عام حمایت کی۔
عدالتی حکم کے باوجود کشمیری مکانات بغیر عدالتی نگرانی یا قانونی طریقہ کار کے مسلسل مسمار کیے جا رہے ہیں، مقبوضہ کشمیر میں جاری دہشتگردی صرف داخلی زیادتی نہیں، بلکہ بین الاقوامی قانونی نظام کی ناکامی بھی ہے۔
بین الاقوامی نشریاتی ادارے ٹی آر ٹی نے کہا کہ اقوام عالم کی خاموشی کا فائدہ اٹھاتے ہوئے بھارت کشمیر میں جنگی جرائم کو قانون کا لبادہ پہنا رہا ہے۔
