شامی صدر احمد الشرع کی وائٹ ہاؤس میں امریکی صدر ڈونلڈ ٹرمپ سے اہم ملاقات ہوئی۔ عرب میڈیا کے مطابق ملاقات میں دوطرفہ تعلقات کے فروغ، علاقائی امن، مشرقِ وسطیٰ کی صورتحال اور عالمی امور پر تفصیلی تبادلہ خیال کیا گیا۔
ملاقات کے بعد صدر ٹرمپ نے شامی ہم منصب کی تعریف کرتے ہوئے کہا کہ "مجھے شامی صدر پسند آئے، ہم پوری کوشش کریں گے کہ شام کامیاب ہو کیونکہ وہ مشرقِ وسطیٰ کا ایک اہم حصہ ہے۔"
ٹرمپ اور احمد الشرع کی تعمیری ملاقات کے بعد امریکی محکمہ خزانہ نے قیصر ایکٹ کے تحت شام پر عائد پابندیاں 6 ماہ کے لیے عارضی طور پر ختم کرنے کا اعلان کر دیا۔
محکمہ خزانہ کے مطابق پابندیوں میں نرمی کا مقصد شام کی معیشت کی بحالی اور شہریوں کی فلاح و بہبود کو فروغ دینا ہے۔
یاد رہے کہ قیصر ایکٹ 2019 میں منظور کیا گیا تھا، جس کا مقصد اُس وقت کی شامی حکومت پر دباؤ ڈالنا تھا۔
ان پابندیوں کے تحت امریکی کمپنیوں اور شہریوں کو شام کی حکومت یا فوج کے ساتھ کاروبار کرنے سے روک دیا گیاتھا۔
امریکا نے جون میں بھی شام پر عائد کچھ پابندیاں ختم کرنے کا اعلان کیا تھا تاہم 'قیصر سیریا سویلین پروٹیکشن ایکٹ'کے تحت عائد پابندیاں برقرار تھیں جو اب عارضی طور پر ختم کردی گئی ہیں۔
