سوشل میڈیا پلیٹ فارم فیس بک نے آسٹریلیا میں نیوز پیجز بحال کرنے کا اعلان کر دیا۔
فیس بک نے آسٹریلیا میں نیوز پیجز بحال کرنے کا اعلان کر دیا، آسٹریلیا میں فیس بک کے منیجنگ ڈائریکٹر کا کہنا ہے کہ آسٹریلوی حکومت کے ساتھ مجوزہ قانون میں ترامیم کے بعد معاملات طے پا گئے ہیں۔
منیجنگ ڈائریکٹر کا کہنا تھا کہ آسٹریلین نیوز پیجز چند دنوں میں بحال کر دیے جائیں گے۔
فیس بک نے آسٹریلیا کے ایک مجوزہ قانون پر اعتراض کرتے ہوئے نیوز پیجز بند کیے تھے، قانون میں کہا گیا تھا کہ نیوز پیجز سے حاصل ہونے والی آمدنی سے آسٹریلیا کو بھی فیس ادا کی جائے گی۔
اس قانون کو نہ صرف فیس بک بلکہ دیگر اداروں نے بھی اپنے مفادات کے لیے نقصان دہ قرار دے دیا تھا، جن کا کہنا تھا کہ یہ قانون پوری دنیا میں ایک مثال قائم کر دے گا جو کاروباری مفادات کو نقصان پہنچانے کا سبب بنے گا۔
آسٹریلوی حکومت اور فیس بک کے درمیان پیدا ہونے والے تنازع پر آسٹریلوی قانون دان جوش فرائیڈنبرگ نے فیس بک کے اقدام کو غیر ضروری قرار دیتے ہوئے مؤقف اپنایا تھا کہ فیس بک غلط اور اپنی طاقت کا ناجائز استعمال کر رہا ہے۔
واضح رہے کہ فیس بک کی جانب سے آسٹریلین ذرائع ابلاغ کے صفحات کو شیئر کرنے پر پابندی کی وجہ سے صارفین کو سخت مشکلات کا سامنا تھا۔
