مارک زکربرگ کی کمپنی میٹا نے اعلان کیا ہے کہ فیس بک اور انسٹا گرام کے اشتہار فری ورژن کو متعارف کرایا جائے گا۔ غیر ملکی خبر رساں ادارے کی رپورٹ کے مطابق اس پروگرام کے تحت برطانوی ویب صارفین کو ماہانہ 2.99 پاؤنڈ اور موبائل فون صارفین کو 3.99 پاؤنڈ فیس ادا کرنی ہوگی۔
کمپنی ترجمان کے مطابق اشتہارات سے پاک سروس کے لیے صارفین ماہانہ فیس ادا کریں گے، تاہم اشتہارات کے ساتھ پلیٹ فارمز کے استعمال پر کوئی فیس نہیں لی جائے گی۔
یہ سبسکرپشن سروس آئندہ چند ہفتوں میں مرحلہ وار متعارف کرائی جائے گی، اور جو صارفین سبسکرپشن نہیں لیں گے وہ بدستور اشتہارات دیکھتے رہیں گے۔
یہ ماڈل یورپی ریگولیٹرز کی بڑھتی ہوئی نگرانی کے جواب میں پیش کیا جا رہا ہے، اور توقع کی جا رہی ہے کہ مستقبل میں دیگر ممالک میں بھی یہی ماڈل متعارف کرایا جائے گا۔
یاد رہے کہ اس سے قبل یورپی یونین میں میٹا نے اسی طرز کی سروس پیش کی تھی، جسے "ڈیجیٹل مارکیٹس ایکٹ" کی خلاف ورزی قرار دیا گیا تھا۔
یورپی کمیشن نے اس سال میٹا پر 200 ملین یورو کا جرمانہ عائد کیا اور کہا کہ کمپنی کو کم تفصیلی ذاتی ڈیٹا (جیسے عمر، صنف اور مقام) کی بنیاد پر اشتہارات کے لیے ایک مفت ورژن دینا چاہیے تھا۔
کمپنی کا مزید کہنا ہے کہ مقررہ فیس کی ادائیگی کرنے والے صارفین کو دوران ویڈیو اشتہارات نہیں دکھائے جائیں گے اور نہ ہی ان کا ڈیٹا اشتہارات کے لیے استعمال ہوگا۔
