آئی ٹی ایف ماسٹرز ورلڈ چیمپئن شپ: اعصام الحق ٹائٹل برقرار رکھنے میں کامیاب، پاکستان نے چار تمغے حاصل کیے

اعصام الحق نے آسٹریا کی نینا ہرمن کے ساتھ جوڑی بنا کر فائنل میں ٹاپ سیڈ پرتگالی جوڑی فریڈ گل اور ریٹا فریٹس کو 6-4، 6-3 سے شکست دی۔

اس کامیابی کے ساتھ پاکستان نے لزبن میں ہونے والی آئی ٹی ایف ماسٹرز ورلڈ ٹیم اور انفرادی چیمپئن شپ میں مجموعی طور پر چار تمغے حاصل کیے۔

اعصام الحق اور عقیل خان نے مینز 45 پلس ڈبلز میں سلور میڈل جیتا، جہاں انہیں فرانس کے جیک گلے اور ژاں بپٹسٹ رینالٹ کے ہاتھوں سخت مقابلے کے بعد 1-6، 7-6، [10-7] سے شکست ہوئی۔

عقیل خان نے جرمنی کی ایلین اراناس روتھ کے ساتھ 40 پلس مکسڈ ڈبلز میں کانسی کا تمغہ بھی اپنے نام کیا۔

پاکستان اس سے قبل مینز 45 پلس ورلڈ ٹیم چیمپئن شپ کے فائنل تک پہنچا تھا، جہاں اسے سلور میڈل پر اکتفا کرنا پڑا۔

پاکستان کے چار تمغوں میں 40 پلس مکسڈ ڈبلز میں اعصام الحق اور نینا ہرمن کا گولڈ، مینز 45 پلس ڈبلز میں اعصام الحق اور عقیل خان کا سلور، 40 پلس مکسڈ ڈبلز میں عقیل خان اور ایلین اراناس روتھ کا برونز، جبکہ مینز 45 پلس ورلڈ ٹیم چیمپئن شپ کا سلور میڈل شامل ہے۔

جیمور ٹینس سینٹر لزبن میں پاکستان کی شاندار کارکردگی اور اعصام الحق کا اپنے عالمی ٹائٹل کا کامیاب دفاع، بین الاقوامی ماسٹرز ٹینس میں ملک کے لیے ایک یادگار ایونٹ ثابت ہوا۔