پاکستان کرکٹ ٹیم کے جارح مزاج بیٹر فخر زمان نے ٹی ٹوئنٹی انٹرنیشنل کرکٹ میں اہم سنگ میل عبور کرلیا۔ فخر زمان نے منگل کو سہ ملکی ٹی ٹوئنٹی سیریز کے چوتھے میچ میں افغانستان کے خلاف شارجہ کرکٹ اسٹیڈیم میں ایک بڑا اعزاز حاصل کر لیا۔
انہوں نے ٹی ٹوئنٹی انٹرنیشنل میچز کھیلنے کی سنچری مکمل کرلی۔
فخر زمان نے 2017 میں ویسٹ انڈیز کے خلاف اپنے ٹی ٹوئنٹی کیریئر کا آغاز کیا تھا اور منگل کو افغانستان کے خلاف میچ فخر کا 100 واں ٹی ٹوئنٹی انٹرنیشنل میچ تھا۔
جس میں وہ 25 رنز بناکر آؤٹ ہوئے۔
فخر زمان 100 ٹی ٹوئنٹی انٹرنیشنل میچز کھیلنے والے چھٹے پاکستانی کھلاڑی ہیں۔
اس سے قبل بابر اعظم، محمد حفیظ ، شعیب ملک ، شاداب خان اور محمد رضوان بھی 100 ٹی ٹوئنٹی انٹرنیشنل میچز کھیل چکے ہیں۔
واضح رہے کہ منگل کو سہ ملکی ٹی ٹوئنٹی سیریز کے چوتھے میچ میں افغانستان نے پاکستان کو 18 رنز سے شکست دی۔
افغانستان نے پہلے کھیلتے ہوئے مقررہ 20 اوورز میں 5 وکٹ کے نقصان پر 169 رنز بنائے۔ جواب میں پاکستان کی ٹیم 9 وکٹوں کے نقصان پر 151 رنز بناسکی۔
