پاکستان کرکٹ ٹیم کے سابق کپتان سرفراز احمد بھی کراچی میں بارش کے بعد طویل بجلی کی بندش سے تنگ آگئے۔ منگل کی صبح سے جاری بارش کے نتیجے میں شہر کے 550 فیڈرز متاثر ہوئے جس کے باعث متعدد علاقوں میں بجلی معطل رہی۔
ترجمان کے-الیکٹرک کے مطابق 2100 میں سے 1550 سے زائد فیڈرز سے بجلی کی فراہمی جاری ہے۔
بجلی کی بندش پر سرفراز احمد نے بھی ردِعمل دیا اور حکام سے بجلی بحالی کی اپیل کی۔
انہوں نے انسٹاگرام پر اسٹوری شیئر کرتے ہوئے کہا کہ بفرزون کی بجلی 10 گھنٹے سے بند ہے، حتیٰ کہ یو پی ایس بھی جواب دے گیا ہے۔
دوسری جانب، ایندھن کی سپلائی معطل ہونے کے باعث کے-الیکٹرک کی گاڑیوں کی آمدورفت بھی متاثر ہو رہی ہے۔
واضح رہے کہ کراچی میں موسلا دھار بارشوں کے بعد ہر طرف پانی ہی پانی ہے اور اربن فلڈنگ کی صورتحال ہے۔
کئی علاقوں میں گھروں میں پانی داخل ہوگیا جبکہ بارش کے دوران کرنٹ لگنے اور دیواریں گرنے سے 9 افراد جان سے گئے۔
آج شہر میں عام تعطیل کا اعلان کیا گیا ہے۔
