حکومت پاکستان نے کھیلوں کے مختلف شعبوں میں شاندار خدمات اور نمایاں کارکردگی پیش کرنے والی نامور شخصیات کو سول اعزازات سے نوازنے کا اعلان کیا ہے۔
یہ اعزازات اُن کھلاڑیوں اور شخصیات کو دیے جائیں گے جنہوں نے اپنی محنت، لگن اور غیر معمولی کامیابیوں کے ذریعے پاکستان کا پرچم دنیا بھر میں بلند کیا۔
تفصیلات کے مطابق سابق کپتان شاہد خان آفریدی سمیت کھیلوں سے وابستہ دس نامور شخصیات کو قومی اعزازات دیے جائیں گے۔
اعزاز پانے والوں میں شاہد خان آفریدی، نوجوان کوہ پیما شہروز کاشف اور مرحوم گھڑ سوار ملک محمد عطا شامل ہیں جنہیں ہلال امتیاز سے نوازا جائے گا۔
اسی طرح سابق ویمن کرکٹر ثنا میر اور ڈسکس تھرو میں شاندار کارکردگی دکھانے والے حیدر علی کو ستارہ امتیاز دیا جائے گا۔
ان کے علاوہ اسکواش میں حمزہ خان، شوٹنگ میں محسن نواز اور ٹینس کے شعبے میں راشد ملک کو تمغہ امتیاز دیا جائے گا۔
اس کے علاوہ شاہ زیب رند کو کراٹے اور محمد سجاد کو کبڈی میں پرائیڈ آف پرفارمنس ایوارڈ سے نوازا جائے گا۔
واضح رہے کہ حکومت کی جانب سے کھلاڑیوں کو 23 مارچ 2026 کو یوم پاکستان کے موقع پر اعلیٰ ترین قومی اعزازات سے نوازا جائے گا۔
