قومی ٹیم کے سابق کپتان وسیم اکرم نے بابراعظم کی ایشیا کپ کے لیے اسکواڈ میں واپسی کی حمایت کرتے ہوئے مشورہ دیا کہ انہیں تیسرے نمبر پر بیٹنگ کرنی چاہیے۔
کرکٹ پاکستان کو خصوصی انٹرویو دیتے ہوئے وسیم اکرم کا کہنا تھا کہ اگر میرے پاس اختیار ہوتا تو میں بابراعظم کو ضرور قومی ٹی20 ٹیم میں شامل کرتا کیوں کہ آگے ایشیا کپ اور اس کے بعد ٹی20 ورلڈکپ آرہا ہے جس کے لیے ہمیں ایک سینئر بیٹر کی ضرورت ہے۔
انہوں نے کہا کہ شائقین کرکٹ کو یاد ہوگا کہ جب انہوں نے 2019 میں سمرسیٹ کی نمائندگی کی تھی تو وہ تقریباً 150 کے اسٹرائیک ریٹ سے رنز بنا رہے تھے، وہ اپنی بیٹنگ کو حالات کے مطابق ڈھالنے کی صلاحیت رکھتے ہیں۔
سابق کپتان کا کہنا تھا کہ جب ہم 140 یا 160 رنز کے ہدف کا تعاقب کررہے ہوں تو خاص طور پر بڑی ٹیموں کے خلاف ہمیں ایک ایسے کھلاڑی کی ضرورت ہوتی ہے جو ذمہ داری لے اور باقی 10 کھلاڑیوں کو ساتھ لے کر چلے۔
انہوں نے کہا کہ بابراعظم دنیا کے بہترین کھلاڑیوں میں سے ایک ہیں، وہ اپنے کھیل کو فارمیٹ اور میچ کی صورتحال کے مطابق ایڈجسٹ کرتے ہیں، وہ ماضی میں بھی ایسا کرچکے ہیں اور مستقبل میں بھی کرسکتے ہیں۔
ان کا مزید کہنا تھا کہ بابراعظم کے اندر ابھی بھی بہت کرکٹ باقی ہے اور وہ پاکستان کے لیے بہت کچھ حاصل کر سکتے ہیں، ہمیں سب کو ان کا ساتھ دینا چاہیے۔
ایک سوال کے جواب میں وسیم اکرم نے کہا کہ کوچ بابراعظم کو کسی نمبر پر بھی کھلا سکتا ہے لیکن میری رائے میں ان کے لیے تیسرے نمبر پر بیٹنگ کرنا بہتر ہے، لیکن یہ صورتحال پر منحصر ہوگا، اگر زیادہ اوورز باقی ہوں تو کوئی اور بھی اوپننگ کے لیے جاسکتا ہے۔
واضح رہے کہ بابراعظم نے آخری بار دسمبر 2024 میں جنوبی افریقہ کے خلاف ٹی20 انٹرنیشنل کھیلا تھا، اپنی آخری 10 اننگز میں انہوں نے 236 رنز بنائے تھے جس میں کوئی بھی نصف سینچری شامل نہیں تھی۔
بابراعظم کو کم اسٹرائیک ریٹ کی بنیاد پر ٹیم سے ڈراپ کر دیا گیا تھا، تاہم اب فخر زمان کے زخمی ہونے کے بعد سینئر بیٹر کی واپسی کے لیے آوازیں بلند ہو رہی ہیں۔
