کراچی کے علاقے اورنگی ٹاؤن میں مشتعل علاقہ مکینوں نے ایک ڈاکو کو کھمبے سے باندھ کر زندہ جلا دیا جب کہ ڈاکو کو زندہ جلانے کے واقعے کے دوران پولیس موقع پر نہ پہنچ سکی جس پر اعلیٰ افسر نے ایس ایچ او کو معطل کر دیا۔ دوسری جانب ڈاکو کو جلانے کے واقعے کا تیسرا مقدمہ بھی درج کر لیا گیا۔
پیر کو یہ واقعہ اس وقت پیش آیا جب مبینہ ڈاکو نے سیکٹر 7-اے میں مزاحمت پر شہری عبدالحسن کو فائرنگ کر کے قتل کر دیا تھا۔
واقعے نے پورے علاقے میں شدید غم و غصہ پیدا کیا، جس کے بعد شہریوں نے مشتعل ہو کر ڈاکو کو پکڑا، تشدد کا نشانہ بنایا اور پھر آگ لگا دی۔
عینی شاہدین کے مطابق آگ لگنے کے بعد ڈاکو شعلوں میں گھرا ہوا خود کو کھولنے کی کوشش کرتا رہا۔ آگ کی شدت بڑھنے پر اس نے اپنی جلتی ہوئی قمیض بھی اتار دی، مگر اس کوشش کے باوجود وہ خود کو بچا نہ سکا۔
پولیس کے مطابق اطلاع ملنے پر اہلکار موقع پر پہنچے اور مٹی ڈال کر آگ پر قابو پایا۔ ڈاکو کو شدید جھلس جانے کی حالت میں اسپتال منتقل کیا گیا، جہاں وہ زخموں کی تاب نہ لاتے ہوئے دم توڑ گیا۔
ریسکیو حکام کے مطابق ہلاک ہونے والا ڈاکو ساجد ولد زرین داد، ڈی سلویٰ ٹاؤن کا رہائشی تھا۔
پولیس نے موقع سے شواہد جمع کر لیے ہیں اور واقعے کے ذمہ دار افراد کی نشاندہی کے لیے تحقیقات شروع کر دی گئی ہیں۔ حکام کا کہنا ہے کہ اگرچہ جرائم قابلِ مذمت ہیں، مگر قانون ہاتھ میں لینا مزید سنگین نتائج پیدا کر سکتا ہے۔
ڈاکو کو زندہ جلانے کا مقدمہ درج، ایس ایچ او معطل
کراچی کے علاقے اورنگی ٹاؤن میں شہری کے قتل اور مشتعل ہجوم کے ہاتھوں ڈاکو کو جلائے جانے کے معاملے پر پولیس افسر کو معطل کردیا گیا جب کہ پولیس نے واقعے کا تیسرا مقدمہ بھی درج کرلیا۔ پولیس کے مطابق نیا مقدمہ پولیس اہلکار کی مدعیت میں درج کیا گیا ہے۔
تفصیلات کے مطابق واقعہ یکم دسمبر کی صبح 8 بجے اورنگی ٹاؤن سیکٹر 7-F میں پیش آیا، جہاں اطلاع ملنے پر پولیس موقع پر پہنچی تو معلوم ہوا کہ دو ڈاکوؤں نے عبدالحَنّان نامی شہری کو فائرنگ کرکے قتل کردیا تھا۔
واقعے کے بعد علاقے کے مشتعل افراد نے ایک ڈاکو کو پکڑ کر شدید تشدد کا نشانہ بنایا اور ل آگ لگا دی۔ جل کر ہلاک ہونے والے ڈاکو کی شناخت ساجد کے نام سے ہوئی۔
پولیس کے مطابق 30 سے 35 نامعلوم افراد کے خلاف 302، 393 اور 397 کی دفعات کے تحت مقدمہ درج کرلیا گیا ہے۔
ادھر واقعے کے دوران ایس ایچ او کے موقع پر نہ پہنچنے پر اعلیٰ حکام نے کارروائی کرتے ہوئے ایس ایچ او اورنگی ٹاؤن یوسف مہر کو غفلت برتنے پر معطل کردیا۔ معطل افسر کو ہیڈ کوارٹر ویسٹ رپورٹ کرنے کا حکم دیا گیا ہے۔
