سندھ کابینہ نے کراچی میں رینجرز کی تعیناتی مزید ایک سال کے لیے بڑھانے کی منظوری دے دی۔
وزیراعلیٰ سندھ سید مراد علی شاہ کی زیر صدارت کابینہ اجلاس میں کراچی میں رینجرز کی تعیناتی مزید ایک سال کے لیے بڑھانے کی منظوری دیدی گئی۔ رینجرز کی تعیناتی کی نئی مدت نو دسمبر 2025 سے مؤثر ہوگی۔
ترجمان وزیراعلیٰ سندھ کے مطابق رینجرز انسدادِ دہشت گردی ایکٹ کے تحت اختیارات کے ساتھ پولیس کی معاونت جاری رکھے گی۔
اجلاس میں شامل 27 نکات پر غور اور فیصلے ہوں گے، اسلام کوٹ تا چھوڑ اوربن قاسم سے پورٹ قاسم تک ریلوے لائن بچھانے کا کام کیا جائے گا، اکتوبر 2025ء میں سندھ حکومت اور وزارت ریلویز کے درمیان ایم او یو ہوا تھا، پروجیکٹ کے تحت تھر کول سے چھوڑ تک 105 کلومیٹر ریلوے لائن بچھائی جائے گی، بن قاسم سے پورٹ قاسم تک 9 کلومیٹر ڈبل ٹریک ریلوے لائن بچھائی جائے گی۔
وزیراعلیٰ سندھ نے کہا کہ سندھ حکومت اور وزارتِ ریلویز کے درمیان برابر کی شراکت داری ہے، منصوبے کی ابتدائی لاگت 75 ارب روپے تھی، اراضی کی لاگت بھی 50 فیصد ایکویٹی شیئر کے طور پر شمار ہوگی، پروجیکٹ کی پی سی ون 53.72 ارب روپے منظور ہو چکی ہے، سندھ حکومت 26.86 ارب روپے اور6.61 ارب روپے پہلے ہی مختص کرچکی ہے، اب منصوبے کی کل لاگت 90 ارب روپے ہوگئی ہے۔
اجلاس کو بتایا گیا کہ سندھ سولر انرجی پروجیکٹ ورلڈ بینک کے تعاون سے شروع کیا گیا ہے، سندھ سولر انرجی پروجیکٹ 27.4 بلین روپے کا منصوبہ ہے، سولر انرجی پروجیکٹ میں 3 بلین روپے کا فراڈ ہوا ہے، سندھ کابینہ نے کنٹریکٹنگ فرم کو بلیک لسٹ کرنے کی سفارش کی۔
