سندھ حکومت نے نیا سندھ واٹر لا متعارف کرانے کی تیاری شروع کردی ہے۔ اس سلسلے میں صوبائی وزیر آبپاشی جام خان شورو اور سیکرٹری آبپاشی ظریف اقبال کھیڑو کی ورلڈ بینک کے وفد سے ملاقات ہوئی، جس میں پراجیکٹ ڈائریکٹر نذیر میمن اور دیگر افسران بھی شریک تھے۔
ملاقات کے دوران سواٹ منصوبے اور نئے سندھ واٹر لا کی تیاری میں پیش رفت سمیت مختلف امور پر تفصیلی تبادلہ خیال کیا گیا۔
ترجمان کے مطابق محکمہ آبپاشی اور سیڈا کے افسران پر مشتمل کمیٹی آئندہ ماہ تک قانونی مسودے کو حتمی شکل دے کر وزارت آبپاشی سندھ کو پیش کرے گی۔
وزیر آبپاشی جام خان شورو نے کہا کہ سندھ واٹر لا کی منظوری کابینہ اور سندھ اسمبلی سے لی جائے گی۔
ان کا کہنا تھا کہ یہ قانون سندھ میں پانی کی منصفانہ تقسیم، بہتر انتظام، اور ماحولیاتی تحفظ کے لیے ایک اہم سنگ میل ثابت ہوگا۔
