مسلم لیگ ن سے اتحاد ہماری مجبوری ہے، گورنر پنجاب

گورنر خیبر پختونخوا فیصل کریم کنڈی کے ساتھ پریس کانفرنس کرتے ہوئے گورنر پنجاب سردار سلیم حیدر کا کہنا تھا کے پی حکومت کو حقوق لینے کے لیے سیاسی طریقہ اپنانا ہو گا، شہباز شریف اسی ملک کے وزیراعظم ہیں، ان سے تعلقات اچھےکریں۔

ان کا کہنا تھا سیاسی اختلاف رکھیں، لیکن صوبے کی عوام کے حقوق آپ کی ذمہ داری ہے، آپ کو اچھے ورکنگ ریلیشن سے صوبے کو حقوق دلوانے ہوں گے۔

سردار سلیم حیدر کا کہنا تھا پنجاب حکومت کے ساتھ بہتر طریقے سے چل رہے تھے، وزیر اعلیٰ پنجاب مریم نواز کو غصہ نہیں کرنا چاہیے تھا۔

انہوں نے کہا کہ وزیراعظم نے پیپلز پارٹی کے تحفظات دور کرنے کی یقین دہانی کرائی ہے، پیپلز پارٹی اور مسلم لیگ ن کے درمیان الائنس مجبوری کا الائنس ہے، کارکن ایک دوسرے کو قبول کرنے کو تیار نہیں، لیکن یہ محبت کا نہیں مجبوری کا رشتہ ہے کیونکہ پاکستان ہمیں سب سے مقدم ہے، ملک کی بہتری کے لیے اپنا نقصان برداشت کرنے کو تیار ہیں۔

گورنر کے پی فیصل کریم کنڈی نے کہا کہ ماضی میں نہروں کے معاملے پر صوبوں میں تلخی ہوئی، صوبے کی ترقی اور امن کے راستے میں گورنر ہاؤس کبھی رکاوٹ نہیں بنے گا۔