وزیراعلیٰ پنجاب نے صوبے بھر کو زہریلے صنعتی مادوں سے پاک کرنے کیلئے میگا آپریشن کا حکم جاری کردیا ہے ۔
صنعتوں سے نکلنے والے زہریلے کچرے اور مواد کو نہروں اور نالوں میں پھینکنے پر مکمل پابندی عائد کردی گئی ، زہریلا کچرا عوام میں مہلک بیماریاں پھیلانے کی بنیادی وجہ ہے۔
اس کے علاوہ ویسٹ ٹریٹمنٹ کے بغیر ہاؤسنگ سوسائٹیاں بند کرنے کا بھی فیصلہ کیا گیا ہے ، مریم نواز نے ہڈیارہ ڈرین میں زہریلے اور انسانی صحت کے لئے خطرناک کچرا ڈالنے کا نوٹس لیتے ہوئے اداروں کو 10 اگست تک ہڈیارہ ڈرین کی صفائی کی ڈیڈ لائن دے دی۔
اسی سلسلے میں سینئر وزیرپنجاب مریم اورنگزیب کی زیر صدارت اجلاس ہوا ، اجلاس میں زہریلے صنعتی مادے چھوڑنے والے یونٹس کیخلاف کارروائی کافیصلہ کیا گیا۔
ضلعی انتظامیہ، آبپاشی، واسا، انڈسٹری سمیت دیگر محکمے مل کر میگا آپریشن کریں گے،پنجاب بھر میں نہروں اور نالوں کا معائنہ ہوگا، ماحول کا عالمی معیار قائم کیا جائے گا۔
آلودگی پھیلانے پرجرمانوں کی قانون سازی مکمل ہونے پر فوری عمل درآمد کرنے کا فیصلہ کیا گیا، حکومت ویسٹ ٹریٹمنٹ پلانٹ لگانے کے لئے صنعتوں کو بلا سود قرضے بھی دیگی۔
مریم اورنگزیب نے ہدایت کی کہ 10اگست سے خلاف ورزی کرنے والوں کیخلاف فیصلہ کن کارروائی کا آغاز کیا جائے، 31اگست تک مکمل ہیلتھ سروے پیش کیا جائے، رپورٹ پرعمل یقینی بنایا جائے۔
