خیبر پختونخوا میں کاؤنٹر ٹیررازم ڈپارٹمنٹ (سی ٹی ڈی) نے ایک کارروائی کے دوران کالعدم ٹی ٹی پی سے تعلق رکھنے والے دہشت گرد حماد ظاہر کو ہلاک کر دیا۔ حکام کے مطابق سی ٹی ڈی مردان ریجن اور نوشہرہ پولیس نے مشترکہ سرچ اینڈ اسٹرائیک آپریشن کیا۔ کارروائی غائبانہ بابا کے علاقے میں کی گئی جہاں فریقین کے درمیان فائرنگ کا تبادلہ ہوا۔
ترجمان سی ٹی ڈی نے بتایا کہ مقابلے میں ٹی ٹی پی انتخاب عالم گروپ کا اہم دہشت گرد حماد ظاہر مارا گیا، جو پولیس کانسٹیبل مقصود کی ٹارگٹ کلنگ میں ملوث تھا۔
سی ٹی ڈی کے مطابق ہلاک دہشت گرد قتل، اقدامِ قتل، بھتہ خوری اور دیگر سنگین جرائم سمیت متعدد مقدمات میں مطلوب تھا۔
