وزیر خارجہ شاہ محمود قریشی کا کہنا ہے کہ حکومت ملک سے دہشتگردی کے مکمل خاتمے کیلئے پرعزم ہے۔
ملتان میں قومی اسمبلی کے حلقہ این اے ۔157 کے دورے کے موقع پر میڈیا سے گفتگو کرتے ہوئے انھوں نے کہا کہ گزشتہ دس سالوں میں لئےگئے قرضے کا ذمہ دار کون ہے، اسد عمر سمیت کوئی بھی چٹکی بجا کر حالات درست نہیں کرسکتا۔
شاہ محمود قریشی کا کہنا تھا کہ کچھ قوتیں ہیں جو پورس کے ہاتھی ہیں، حکومت گرانا مسئلے کا حل ہوتا تو کوئی حکومت نہ چل سکتی، ٹرین مارچ کریں، سندھ مارچ کریں پنجاب آئیں یہ بلاول کا سیاسی حق ہے۔
وزیر خارجہ نے کہا کہ نیب خود مختار ادارہ ہے جو حکومت کے تابع نہیں، نیب کرپشن ختم کرنے میں مدد کرے اور قوم توقع کرتی ہے کہ نیب بغیر دباؤ کرپشن فری پاکستان کی طرف بڑھتاجائے گا۔
ایک سوال پر شاہ محمود قریشی کا کہنا تھا کہ اسحاق ڈار نے ڈالر کی قیمت کو مصنوعی بریک لگا رکھے تھے، اسد عمر سمیت کوئی بھی چٹکی بجا کر حالات درست نہیں کرسکتا۔
کوئٹہ میں خودکش حملے پر بات کرتے ہوئے شاہ محمود قریشی نے کہا کہ واقعے میں معصوم لوگ جاں بحق ہوئے، دیکھنا ہے دہشت گردی کے پیچھے فرقہ واریت ہے یا کوئی غیر ملکی ہاتھ تاہم ہم بھارت کی طرح بغیر تحقیقات بات نہیں کریں گے۔
انہوں نے کہا کہ بھارت میں انتخابات ہو رہے ہیں اور 19 مئی تک محتاط رہنے کی ضرورت ہے۔
شاہ محمودقریشی کا کہنا تھا کہ افغان امن عمل کے لیے سہولت دے رہے ہیں، اگلی نشست دوحہ میں ہونی ہے ہماری کوشش ہے نتیجہ خیز ہو، افغانستان کے اندرونی معاملات میں مداخلت کا ارادہ ہے نہ کی ہے، ہم چاہتے ہیں افغانستان میں امن، استحکام اور خوشحالی آئے۔
وزیر خارجہ کا کہنا تھا کہ خارجہ اہداف کو عبور کریں گے، وزیراعظم عمران خان پہلے ایران اور اس کے بعد 25 تاریخ کو چین جائیں گے، چین کی قیادت کے ساتھ مذاکرات ہوں گے۔
