اڈیالہ جیل کے ذرائع کے مطابق عمران خان مکمل طور پر صحت مند ہیں اور جیل آنے والے ہر فرد کی بانی چیئرمین پی ٹی آئی سے ملاقات کرائی جاتی ہے۔ ذرائع کا کہنا ہے کہ بانی پی ٹی آئی جیل میں محفوظ بھی ہیں اور صحت کے حوالے سے کوئی مسئلہ درپیش نہیں۔
جیل ذرائع نے بتایا کہ ہفتے میں ایک بار بشریٰ بی بی کی عمران خان سے ملاقات کرائی جاتی ہے، جب کہ ملاقاتوں کا تمام عمل جیل مینوئیل کے مطابق ہوتا ہے۔
ذرائع کے مطابق اڈیالہ جیل میں ایک بیرک کے چھ کمرے بانی پی ٹی آئی کے زیرِ استعمال ہیں، جہاں انہیں ٹی وی اور اخبار کی سہولت بھی فراہم کی گئی ہے۔
مزید بتایا گیا کہ عمران خان کو ہفتے میں ایک بار باہر سے کھانا منگوانے کی اجازت ہے، جس میں عموماً دیسی مرغی اور مچھلی شامل ہوتی ہے۔
جیل حکام کا کہنا ہے کہ جیل کی حدود میں آنے والے ہر شخص کی ملاقات کرائی جاتی ہے، تاہم اڈیالہ جیل کی حدود سے باہر کے معاملات کی ذمہ داری جیل انتظامیہ پر عائد نہیں ہوتی۔
