وفاقی آئینی عدالت کے پہلے چیف جسٹس امین الدین خان نے آئینی عدالت کے قیام کے بعد اپنا پہلا پیغام جاری کر دیا۔ جسٹس امین الدین خان نے کہا کہ وفاقی آئینی عدالت کے پہلے چیف جسٹس کی حیثیت سے یہ میرے لیے ایک اعزاز ہے کہ مجھے اس ادارے کے قیام میں حصہ ڈالنے کا موقع ملا۔
چیف جسٹس نے مزید کہا کہ میری دلی خواہش ہے کہ وفاقی آئینی عدالت پاکستان میں آئینی بالادستی کی محافظ بنے اور آنے والی نسلوں کے لیے عدل و انصاف کی مضبوط علامت کے طور پر قائم رہے۔
جسٹس امین الدین نے کہا کہ بنیادی حقوق کا تحفظ اس عدالت کی اولین ترجیح ہے۔
انہوں نے اس عدالت کے قیام کو قومی آئینی جدوجہد میں ایک اہم سنگِ میل قرار دیا اور کہا کہ یہ قانون کی حکمرانی کے لیے ہماری اجتماعی وابستگی کی تجدید ہے، جبکہ آئین کی تشریح شفافیت، آزادی اور دیانتداری کے ساتھ کی جائے گی۔
چیف جسٹس نے یہ بھی واضح کیا کہ عدالت کا فریضہ نہایت اہم اور نازک ہے، اور اس کا کردار صرف قضائی نہیں بلکہ ایک مقدس امانت ہے، جو شہریوں کی زندگیوں، آزادیوں اور امنگوں پر گہرا اثر ڈالتی ہے۔
جسٹس امین الدین کا کہنا تھا ہ ہمارا عزم ہے کہ ایک ایسا عدالتی فورم قائم کیا جائے جو دیانت، غیر جانب داری اور علمی بصیرت کی اعلیٰ مثال ہو، ہمارے سامنے آنے والا ہر معاملہ آئین کی بالادستی، انصاف کے اصولوں اور عدالتی وقار کے ساتھ غیر معمولی احتیاط اور منصفانہ انداز میں نمٹایا جائے گا۔
