وزارتِ داخلہ نے تحریک لبیک پاکستان (ٹی ایل پی) پر پابندی عائد کرتے ہوئے اس حوالے سے باضابطہ نوٹیفکیشن جاری کر دیا۔ ذرائع کے مطابق، وفاقی کابینہ نے گزشتہ روز ٹی ایل پی پر پابندی کی منظوری دی تھی، جس کے بعد وزارتِ داخلہ نے مذہبی و سیاسی جماعت پر پابندی کا حتمی نوٹیفکیشن جاری کر دیا ہے۔
نوٹیفکیشن میں کہا گیا ہے کہ وفاقی حکومت کے پاس ایسے معتبر شواہد موجود ہیں جن سے ثابت ہوتا ہے کہ ٹی ایل پی دہشت گردانہ سرگرمیوں میں ملوث ہے۔
مزید بتایا گیا ہے کہ انسدادِ دہشت گردی ایکٹ 1997 کے تحت ٹی ایل پی کو فرسٹ شیڈول میں شامل کرتے ہوئے کالعدم تنظیموں کی فہرست کا حصہ بنا دیا گیا ہے۔
ذرائع کے مطابق، پابندی سے متعلق نوٹیفکیشن ٹی ایل پی کی قیادت اور تمام متعلقہ اداروں کو ارسال کر دیا گیا ہے تاکہ فوری طور پر عمل درآمد یقینی بنایا جا سکے۔
ٹی ایل پی پر پابندی کیلئے قانونی کارروائی کا آغاز
ذرائع کا بتانا ہے کہ ٹی ایل پی پر پابندی کے لیے وزارت قانون نے بھی قانونی کارروائی کا آغاز کر دیا ہے، وزارت قانون اور اٹارنی جنرل کی مشاورت کے بعد سپریم کورٹ میں ریفرنس دائر کیا جائےگا۔
سپریم کورٹ ریفرنس پر فوجداری ٹرائل کی طرح شواہد کا جائزہ لے کر پابندی کا فیصلہ کرےگی۔
ذرائع کے مطابق آئین کے آرٹیکل17کی شق 2 اور 3 کی بنیاد پر ٹی ایل پی پرپابندی کا ریفرنس سپریم کورٹ میں دائر ہوگا۔
وفاقی حکومت دائر ریفرنس میں ٹی ایل پی کی دہشت گردانہ کارروائیوں کے ثبوت دے گی، ریفرنس سپریم کورٹ میں جلد دائر کر دیا جائےگا۔
سیاسی جماعت پر پابندی سے متعلق آئین کیا کہتا ہے؟
آئین کے مطابق کوئی سیاسی جماعت ملکی سلامتی اور وحدانیت کے خلاف کام کرے تو اس پرپابندی لگ سکتی ہے، اس صورت میں سیاسی جماعت پر پابندی آرٹیکل17کی شق 2 کے تحت لگ سکتی ہے۔
آرٹیکل17 کے مطابق کسی سیاسی جماعت پرپابندی کی تصدیق تب تک نہیں ہوتی جب تک سپریم کورٹ فیصلہ نا دے۔
حکومت پابندی کے فیصلے کے بعد 15 دن میں ریفرنس سپریم کورٹ کو ارسال کرتی ہے، آئین کے تحت رجسٹرڈ سیاسی جماعت پر پابندی کا مکمل اطلاق سپریم کورٹ کے فیصلے سے ہو گا۔
یاد رہے کہ چند روز قبل پنجاب کابینہ نے ٹی ایل پی پر پابندی کی منظوری دی اور اس کی سمری وفاقی حکومت کو ارسال کی تھی۔
