وفاقی وزیر خزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا جس دوران حالیہ مون سون بارشوں سے اور سیلاب سے متاثرہ افراد کیلئے 5.8 ارب روپے کا ریلیف پیکج منظور کر لیا گیا ۔
تفصیلات کے مطابق اقتصادی رابطہ کمیٹی نے این ڈی ایم اے کو فوری طور پر 4 ارب روپے جاری کرنے کی ہدایت جاری کر دی ہے ، وزارت خزانہ کے مطابق امداد کا مقصد بارشوں کے متاثرین کی مشکلات میں کمی لانا ہے ۔
ای سی سی نے ملک بھر میں فیول چارجز ایڈجسٹمنٹ کے یکساں اطلاق کی منظوری دیدی ہے ، جبکہ وزیراعظم کے فین ریپلیسمنٹ پروگرام کیلئے 2 ارب روپے کی گرانٹ بھی منظور کر لی گئی ۔
وزارت خزانہ کے مطابق وزیراعظم کے فین ریپلیسمنٹ پروگرام کا جلد اجرا کرنے کا فیصلہ کیا گیاہے ۔ اجلاس میں اسٹیٹ بینک، نیکا، کمرشل بینکوں کے درمیان معاہدے کی ٹرم شیٹ کی منظوری بھی دیدی گئی ۔
ای سی سی اجلاس کے اعلامیے کے مطابق نیشنل سیکیورٹی ڈویژن کیلئے 25 کروڑ کی گرانٹ منظور کر لی گئی ،فنڈز اسٹریٹجک پالیسی پلاننگ سیل پر خرچ کئے جائیں گے، اس حوالے سے باقی ماندہ رقم مرحلہ وار جاری کی جائے گی۔
راست کیو آر کوڈ پر مبنی ادائیگیوں کیلئے 3.5 ارب روپے کی گرانٹ منظور کی گئی ہے ، یہ سبسڈی اسکیم آئندہ تین سال کیلئے جاری رکھنے کا فیصلہ ہوگیا، اسٹیٹ بینک کو اسکیم سے متعلق نوٹیفکیشن فوری جاری کرنے کی ہدایت کر دی گئی ۔ای سی سی نے ملک میں ڈیجیٹل معیشت کے فروغ کیلئے اقدامات کی ہدایت کردی۔
