وفاقی کابینہ کی خیبر پختونخوا میں سیلاب متاثرین کے لیے ایک ماہ کی تنخواہ عطیہ کرنے کا اعلان کردیا۔
وزیر اعظم شہباز شریف کی زیر صدارت سیلاب متاثرین کیلئے جاری امدادی سرگرمیوں سے متعلق اجلاس ہوا وزیراعظم نے سیلاب متاثرین کی مدد کیلئے وفاقی اداروں کو مزید متحرک ہونے کی ہدایت کی۔ وزیراعظم نے کہا کہ مصیبت کی اس گھڑی میں ہمیں متاثرہ لوگوں کی مدد و بحالی یقینی بنانی ہے، یہ سیاست نہیں، لوگوں کی خدمت کرنے کا وقت ہے-
۔سیلاب سے متاثرہ اضلاع میں معاوضے کا پیکیج دوگنا ، چیکس کی تقسیم آج سے شروع ہو جائیگی-
ان کا کہنا تھا کہ وفاقی حکومت وزیراعظم پیکیج کے تحت سیلاب متاثرین میں امدادی رقوم فراہم کرے گی ، امدادی اشیا کی تقسیم و بحالی کے آپریشن کی نگرانی وزیرِ امور کشمیر جبکہ بجلی، پانی اورسڑکوں کی بحالی کی نگرانی وفاقی وزراء کریں گے۔
انہوں نے مزید کہا کہ متعلقہ وزراء خیبر پختونخوا، آزاد کشمیر اور گلگت بلتستان خود جائیں، این ایچ اے صوبائی یا قومی شاہراہوں میں تخصیص نہ کرے، امداد کیلئے راستے کھولنا پہلی ترجیح ہونی چاہیے۔
وزیراعظم کا کہنا تھا کہ وزیر بجلی سیلاب سے متاثرہ علاقوں کامعائنہ کرے جبکہ این ڈی ایم اے فوری طور پر نقصانات کا حتمی جائزہ پیش کرے ، اس کے علاوہ امدادی اشیاء کی متاثرین میں تقسیم کا لائحہ عمل پیش کیا جائے۔
وزیراعظم نے وزارت خزانہ کو این ڈی ایم اے کو ضروری وسائل فراہم کرنے کی ہدایت کرتے ہوئے کہا کہ آخری شخص تک مدد اور بنیادی انفراسٹرکچر کی بحالی تک وفاقی وزرا وہیں رہیں گے، وزرات صحت ادویات و ڈاکٹرز کی ٹیموں کو خیبر پختونخوا بھیجے اور کیمپس قائم کیے جائیں، بینظیر انکم سپورٹ پروگرام کو بھی متاثرین کی مدد کیلئے متحرک کیا جائے۔
