صدر مملکت آصف علی زرداری سے ایوانِ صدر میں اسلامی جمہوریہ ایران کے صدر ڈاکٹر مسعود پزشکیان نے ملاقات کی ہے جس کے دوران دونوں رہنماؤں نے پاک ایران تعلقات کو مزید وسعت دینے اور باہمی فائدے کے شعبوں میں تعاون بڑھانے کے عزم کا اعادہ کیا۔
ملاقات کے دوران صدر آصف زرداری نے کہا کہ پاکستان اور ایران کے برادرانہ تعلقات مشترکہ مذہب، ثقافت اور باہمی احترام پر مبنی ہیں۔
انہوں نے خطے میں امن و استحکام کے لیے مربوط سفارتی کوششوں کی ضرورت پر زور دیتے ہوئے ایران کے اصولی مؤقف اور مشکل وقتوں میں یکجہتی کو سراہا۔
صدر مملکت نے تہران کی مستقل حمایت اور رہبرِ معظم آیت اللہ سید علی خامنہ ای کی جموں و کشمیر پر بھارتی غیر قانونی قبضے کے خلاف حمایت پر شکریہ ادا کیا۔
آصف زرداری نے ایران پر اسرائیلی جارحیت کی شدید مذمت کی اور 12 روزہ جنگ کے دوران ایرانی قوم کی جرات اور اتحاد کو خراجِ تحسین پیش کیا۔
انہوں نے امید ظاہر کی کہ صدر پزشکیان کا دورہ دونوں ممالک کے تعلقات کو مزید مستحکم کرے گا۔
ایرانی صدر مسعود پزشکیان نے 12 روزہ جنگ کے دوران پاکستان کی قیادت اور عوام کی حمایت پر شکریہ ادا کیا اور کہا کہ پاکستان نے کشیدگی میں کمی اور تنازعات کے پرامن حل کے لیے تعمیری کردار ادا کیا۔
دونوں رہنماؤں نے علاقائی و عالمی امور پر تفصیلی تبادلہ خیال کیا اور خطے کے پرامن و خوشحال مستقبل کے لیے مل کر کام جاری رکھنے پر اتفاق کیا۔
