احتساب عدالت لاہور نے وزیراعظم شہبازشریف اور سابق وزیراعلیٰ پنجاب حمزہ شہباز کو منی لانڈرنگ ریفرنس سے بری کردیے۔ احتساب عدالت کے جج قمرالزماں نے منی لانڈرنگ ریفرنس کا محفوظ فیصلہ سنایا، عدالت نے شہبازشریف اور حمزہ شہبازکی بریت کی درخواستوں کو منظورکرلیا۔
وزیراعظم شہباز شریف اور حمزہ شہباز نے ریفرنس میں بریت کی درخواستیں دائر کررکھی تھیں۔
یاد رہے کہ 10 مئی کو قومی احتساب بیورو (نیب) نے وزیر اعظم شہباز شریف، ان کے بیٹے حمزہ شہباز سمیت دیگر ملزمان کو منی لانڈرنگ ریفرنس میں بے گناہ قرار دے دیا تھا۔
قبل ازیں لاہور کی خصوصی عدالت نے وفاقی تحقیقاتی ادارہ (ایف آئی اے) کی جانب سے بنائے گئے منی لانڈرنگ کے مقدمے میں وزیر اعظم شہباز شریف اور سابق وزیر اعلیٰ پنجاب حمزہ شہباز کی درخواستیں منظور کرتے ہوئے انہیں مقدمے سے بری کردیا تھا۔
واضح رہے کہ منی لانڈرنگ کے مذکورہ ریفرنس میں نیب نے شریف خاندان کے بے نامی بینک اکاؤنٹس کا سراغ لگانے کے دعویٰ کیا تھا جس کے ذریعے انہوں نے اپنے ذاتی بینک اکاؤنٹس میں اربوں کی جعلی ترسیلات وصول کیں، ان کے علاوہ غیر ملکی پے آرڈرز کے ذریعے اربوں روپے کی لانڈرنگ کی گئی جو ان کے بیٹوں حمزہ شہباز اور سلیمان شہباز کے ذاتی بینک اکاؤنٹس میں جمع کرائے گئے۔
