قدرت کے دو انمول تحفے جن کے فائدے جان کر آپ بھی حیران

دنیا بھر میں مختلف اشیاء سے تیار کردہ تیل کا استعمال بیماریوں سے محفوظ رہنے اور صحت مند زندگی کے حصول کے لیے کیا جاتا ہے ۔ یہ تیل مختلف سبزیوں ،میووں اور پھلوں سے نکالا جاتا ہے،جو مارکیٹ میں مہنگے اور سستے داموں مل جاتا ہے ۔آج کے مضمون میں ہم کچھ ایسے ہی فائدہ مند اور موٴثر تیلوں کا ذکر کرنے جارہے ہیں کہ یہ کس طرح اور کیوں مفید ہیں۔

ارنڈی کا تیل

ارنڈی کا تیل یاکیسٹرآئل کثیر المقاصد ویجیٹیبل آئل ہے ،جس کا استعمال دنیا کے تقریباً ہر ملک میں سالہا سال سے کیا جارہا ہے ۔

یہ تیل ارنڈی کے بیجوں (Ricinus communis plants)سے نکالا جاتا ہے ۔اس تیل کی خاصیت یہ ہے کہ اینٹی بیکٹیریل اور دافع سوزش خصوصیات کی بناء پر یہ دنیا بھر میں مشہور ہے۔مختلف صنعتی اور فارما سیوٹیکل کمپنیوں اپنی مصنوعات کی تیاری کے لیے ارنڈی کا تیل استعمال کرتی ہیں ،جس کا سب سے اہم فائدہ مدافعتی نظام کو مضبوط کرنا ہے۔یہ تیل انسانی جسم میں Lymphatic Functionکو متحرک کرتا ہے۔

دوسری جانب ارنڈی کا تیل بہترین قبض کشا تاثیر کا حامل ہے ۔آنکھوں کی تمام تر تکا لیف دور کرنے کے لیے بھی ماہرین اس کے استعمال کا مشورہ دیتے ہیں۔اس تیل میں ایسی خصوصیات پائی جاتی ہیں،جس کے باعث یہ بالوں کی نشوونما اور جلدی مسائل مثلاً سورج کی تمازت سے جھلسی ہوئی جلد ،ایکنی ،خشک جلد اور مختلف نشانات کے خاتمے کے لیے ایک بہترین تیل سمجھا جاتاہے۔

ناریل کا تیل

دنیا بھر میں ناریل کے تیل کی درجہ بندی ”سپر فوڈ“کے طور پر کی جاتی ہے۔ ناریل میں قدرتی طور پر اینٹی بیکٹیریا ،اینٹی ٹاکسائیڈ اور اینٹی فنگل اجزاء شامل ہوتے ہیں اور یہ مختلف وٹامنز اور منرلز سے بھر پور ہوتا ہے۔یوں کہہ لیں کہ ناریل کا تیل فیٹی ایسڈ کا ایک ایسا مجموعہ ہے ،جو صحت پر مثبت اثرات مرتب کرتا ہے۔

ان میں وزن میں کمی،دماغی صلاحیت میں بہتری،گردوں کی اچھی صحت اور مدافعتی نظام سمیت دیگر متاثر کن فوائد شامل ہیں جبکہ تیل میں شامل سیچور یٹڈ فیٹس فائدہ مند کولیسٹرول کی سطح میں اضافہ کرتے ہیں،جو قلبی امراض سے بچاؤ میں مددگار ثابت ہوتا ہے ۔ناریل کا تیل خوبصورتی بڑھانے کا ذریعہ بھی تسلیم کیا جاتا ہے ۔نرم وملائم جلد کا حصول ،بالوں کی نشوونما یا پھر جگمگاتے دانتوں کی خواہش پوری کرنے کیلئے ناریل کا تیل بہترین انتخاب ثابت ہوتاہے۔