اداکارہ مہوش حیات نے برطانوی نشریاتی ادارے بی بی سی کی اردو سروس کو بھی ایک انٹرویو دیا جس میں انہوں نے بولی وڈ میں کام کرنے والے پاکستانی فنکاروں، بولی وڈ ہولی وڈ پر تنقید اور اپنی آنے والی فلموں پر بات کی۔
مہوش حیات نے رواں سال اوسلو میں ایک تقریب کے دوران کہا تھا کہ ہولی وڈ اور بولی وڈ کی فلموں میں پاکستان کو متنازع انداز میں پیش کیا جاتا ہے۔
اس حوالے سے انٹرویو میں مہوش حیات سے سوال کیا گیا کہ اگر ان کے اس بیان سے کوئی ایسا شخص ناراض ہوجائے جو مستقبل میں انہیں کوئی اچھی آفر کرنے والا ہو تو اس پر وہ کیا کہیں گی؟مہوش حیات کا اس حوالے سے کہنا تھا کہ اگر میرے سچ بولنے سے وہ مجھے کاسٹ نہیں کریں گے تو میرا پہلا انتخاب سچ بولنا ہی ہوگا نہ کہ وہ مجھے کاسٹ کریں۔
I was honoured to address distinguished guests in Oslo & talk abt film & peace.Also spoke abt how films frm Hollywood & our neighbours hv vilified Pakistan to a point that even I don't recognise the country that they show.Y is nobdy showing the sacrifices we hv made war on terror pic.twitter.com/hA6V1Q5m0q
— Mehwish Hayat TI (@MehwishHayat) August 11, 2019
مہوش حیات نے بولی وڈ میں کام کرنے والے پاکستانی فنکاروں کے ساتھ بھارت میں کیے گئے سلوک کے حوالے سے بتایا کہ ہمارے اداکاروں نے ان کی فلموں میں زبردست کام کیا لیکن انہوں نے کیا کیا؟ انہوں نے نہ تو ہمارے اداکاروں کو ویزا دیے، نہ فلموں کی پروموشنز کا حصہ بنایا، بس اپنا کام نکالا اور ٹشو پیپر کی طرح پھینک دیا لیکن میرے لیے میری عزت نفس سب سے اہم ہے ایمانداری سے بات کروں تو ہمیں بولی وڈ کی ضرورت نہیں اور نہ ہی بولی وڈ کو ہماری ضرورت ہے، ان کی انڈسٹری بہت بڑی ہے اور ہمیں اپنی انڈسٹری کے لیے کام کرنا چاہیے۔