بھارت کی تامل اور کنٹر فلم انڈسٹری کی اداکارہ نندنی نے والدین کی جانب سے مرضی کے خلاف شادی کے لیے دباؤ ڈالنے پر خودکشی کرلی۔ بھارتی میڈیا کے مطابق اداکارہ نندنی سی ایم نے بنگلور میں اپنے گھر میں خودکشی کی، اور مرنے سے قبل انہوں نے ایک تحریری نوٹ بھی چھوڑا۔
اداکارہ نے تحریری نوٹ والدین کے نام لکھا، جس میں کہا گیا کہ وہ شادی کے لیے دباؤ کا شکار تھی اور ذہنی طور پر اس کے لیے تیار نہیں تھی، جبکہ دیگر مسائل کی وجہ سے وہ ڈپریشن کا شکار بھی تھی۔
بھارتی رپورٹ کے مطابق فی الحال نندنی کی موت کے حقیقی اسباب کے حوالے سے کوئی سرکاری تصدیق نہیں ہوئی ہے، پولیس کا کہنا ہے کہ تحقیقات مکمل ہونے کے بعد مزید معلومات فراہم کی جائیں گی۔
رپورٹس کے مطابق نندنی نے اپنے نوٹ میں لکھا کہ والدین مجھے مرضی کے خلاف شادی پر مجبور کر رہے تھے، میں جذباتی طور پر دباؤ میں تھی۔
پولیس کا کہنا ہے کہ اس نوٹ کے مواد کو تحقیقات کے دوران جانچ کے لیے لیا گیا ہے۔
بھارتی میڈیا کے مطابق یہ ایک حیرت انگیز اتفاق ہے، نندنی حال ہی میں تامل سیریل گوری میں نظر آئی تھیں جس میں ان کے کردار کو زہر پیتے ہوئے دکھایا گیا تھا، جس کے بعد اس منظر نے سوشل میڈیا پر ایک نئی بحث کو جنم دیا ہے۔
تاہم حکام نے اس سین کو ان کی موت کے حالات سے جوڑنے سے انکار کیا ہے۔
