معروف گلوکارہ آئمہ بیگ مبہم انداز میں انسٹاگرام پر واپس آ گئی ہیں، جس سے ان کے مداح حیرت اور تشویش میں مبتلا ہیں۔ فوٹوز اور ویڈیوز شیئرنگ پلیٹ فارم انسٹاگرام پر آئمہ بیگ نے اپنا اکاونٹ دوبارہ فعال کیا اور ساتھ ہی کئی پراسرار اسٹوریز شیئر کیں۔
ایک اسٹوری میں انہوں نے لکھا: "آپ سمجھ رہے تھے یہ ختم ہوگیا ہے؟ انتظار کریں، پلاٹ میں ٹوئسٹ ہے، مجھے یاد کیا؟ ٹھہریں، کچھ آنے والا ہے۔"
اس کے بعد آئمہ بیگ نے مزید اسٹوریز شیئر کرتے ہوئے کہا: "آپ نے ابھی مجھے دیکھنا نہیں تھا لیکن الٹی گنتی شروع ہوگئی ہے۔" انہوں نے یہ بھی بتایا کہ جلد ہی بڑی واپسی ہوگی، لیکن فی الحال اتنا ہی۔
مداحوں کی دلچسپی اس وقت اور بڑھ گئی جب آئمہ بیگ نے مختلف اسٹوریز کے ساتھ اپنی ایک تصویر بھی شیئر کی۔
ان اسٹوریز کے اسکرین شاٹس سوشل میڈیا پر وائرل ہو گئے، جہاں صارفین نے مختلف ردعمل ظاہر کیے۔ کچھ مداح خوش ہیں جبکہ کچھ کا خیال ہے کہ یہ آئندہ آنے والی البم کی تشہیری مہم کا حصہ ہو سکتا ہے۔
واضح رہے کہ آئمہ بیگ نے رواں ماہ کے آغاز میں اپنا انسٹاگرام اکاونٹ ڈی ایکٹیویٹ کر دیا تھا، جس کے ساتھ ان کی شادی کی تصاویر بھی غائب ہو گئی تھیں۔
اس سے پہلے ان کے تعلقات کے حوالے سے کئی افواہیں گردش کر رہی تھیں، تاہم اب گلوکارہ کی واپسی کے ساتھ ہی ان کی شادی کی تصاویر بھی واپس آ گئی ہیں۔
