پاکستان کے سپر اسٹار فواد خان اور بھارتی اداکارہ وانی کپور کی رومانوی فلم 'عبیر گلال' کو بالآخر دنیا بھر میں ریلیز کی نئی تاریخ مل گئی ہے۔
آرتی ایس باگدی کی ہدایت کاری اور وویک بی اگروال کی پروڈکشن میں تیار ہونے والی یہ فلم 12 ستمبر 2025 سے 75 ممالک میں 1000 سے زائد اسکرینز پر نمائش کے لیے پیش کی جائے گی۔
یہ فلم ابتدائی طور پر 29 اگست کو ریلیز ہونے والی تھی، لیکن بھارت اور پاکستان کے درمیان کشیدگی کے باعث اس کا شیڈول ملتوی ہو گیا تھا اور بھارت میں نمائش روک دی گئی تھی۔
تاہم اب یہ فلم بھارت کے علاوہ دنیا کے دیگر ممالک میں ریلیز کی جا رہی ہے۔
فلم کے پروڈیوسرز کا کہنا ہے کہ 'عبیر گلال' بھارت میں ریلیز نہ ہونے کے باوجود عالمی مارکیٹ سے اچھا منافع کما سکتی ہے۔
پاکستان میں عبیر گلال 29 اگست کو ریلیز کی جائے گی جس کا مداحوں کو بےصبری سے انتظار ہے۔
فلم کا میوزک امیت ترویدی نے کمپوز کیا ہے اور اس فلم کے گانے بھی مقبول ہورہے ہیں جو فلم کی ریلیز سے قبل جاری کیے جاچکے ہیں۔
