اقامہ رکھنے والے تمام پاکستانیوں کی معلومات فراہم , فیڈرل بورڈ آف ریونیو (ایف بی آر) نے بڑا قدم اٹھا لیا

ریوینیو ڈویژن کی جانب سے جاری اعلامیے کے مطابق ایف بی آر نے متحدہ عرب امارات کی وزارت خزانہ کو بھیجے گئے خط میں کہا ہے کہ ان تمام پاکستانیوں نے نہ ٹیکس چوری سے پیسہ پاکستان سے نکال کر متحدہ عرب امارات میں رکھا ہوا ہے بلکہ کامیابی سے مالی معلومات کو بھی چھپایا ہوا ہے۔

خط میں کہا گیا ہے کہ خودکار معلومات کے تبادلہ کا فریم ورک اس لیے وضع کیا گیا تھا کہ بین الاقوامی ٹیکس نظام میں شفافیت لائی جائے اور ٹیکس چوری کے خلاف ایک جامع اور موثرنظام اپنایا جائے۔

ایف بی آر نے پاکستان اور متحدہ عرب امارات کے درمیان 9 اکتوبر اور 10 اکتوبر کو دبئی میں منعقدہ اجلاس کا حوالہ دیتے ہوئے کہا ہے کہ اس بات پر اتفاق کیا گیا تھا کہ دونوں ممالک اس حوالے سےمکمل طور پر جواب دیا جائے گا۔ اعلامیے کے مطابق متحدہ عرب امارات کی وزارت خزانہ سے ایف بی آر کو اس سے پہلے بھیجے گئے خطوط کے جواب نہیں دیے۔

ایف بی آر نے اپنے تازہ خط میں کہا کہ پچھلے تمام خطوط کا تا حال کوئی جواب موصول نہیں ہوا جس کی وجہ سے معلومات کے تبادلہ میں کوئی موثر پیش رفت نہیں ہو سکی ہے۔ ان کا کہنا تھا کہ متحدہ عرب امارات پر ایف بی آرئی کی کوشش پر مسلسل خاموشی چھائی ہوئی ہے۔ خط میں کہا گیا ہے کہ ریاستوں کے مابین بہترین تعلقات باہمی تبادلے اور اعلیٰ سطح کے سفارتی دانائی سے استوار ہوتے ہیں۔

خط میں اس بات کا دوبارہ مطالبہ کیا گیا ہے کہ اقامہ رکھنے والے پاکستانیوں کی معلومات فراہم کی جائیں بصورت دیگر پاکستان اس بات پر مجبور ہو گا کہ متحدہ عرب امارات کے ساتھ کیے گئے دوہرے ٹیکسیشن معاہدے کو ختم کر دے۔ یاد رہے کہ ایف بی آر نے 12 اکتوبر 2019 کو متحدہ عرب امارات میں سرمایہ کاری کے ذریعے رہائش حاصل کرنے والے پاکستانی شہریوں کا ڈیٹا حاصل کرنے کا دعویٰ کیا تھا۔ ایف بی آر نے 22 اگست کو متحدہ عرب امارات کو خط ارسال کیا تھا، جس میں اقامہ اور سرمایہ کاری کے ذریعے رہائش حاصل کرنے والے تمام پاکستانی شہریوں کی معلومات فراہم کرنے کی درخواست کی گئی تھی۔

متحدہ عرب امارات کا قانون ایک خاص حد تک سرمایہ کاری کی بنیاد پر غیر ملکیوں کو اقامہ حاصل کرنے کی اجازت دیتا ہے۔