ایمازون سے ٹکر، ‘نون ڈاٹ کام’ نے نئی حکمت عملی تیارکرلی

مشرق وسطیٰ میں ایمازون کی حریف سمجھی جانے والی ای کامرس ویب سائٹ ‘نون ڈاٹ کام’ نے اپنے کاروبار کو وسعت دینے کے لیے نئی منصوبہ بندی تیار کرلی۔

---

نون ڈاٹ کام نے خلیجی ای کامرس مارکیٹ کے بڑے حصے پر قبضے کے لیے سعودی خود مختار فنڈ پی آئی ایف اور دیگر سرمایہ کاروں سے اگلے 3 سے چار سالوں میں 2 بلین ڈالر جمع کرنے کا ارادہ ظاہر کیا ہے، اس ضمن میں اقدامات اٹھائے جارہے ہیں۔

مذکورہ ویب سائٹ کے بانی محمد العبار کا کہنا ہے کہ یہ رقم انفراسٹرکچر کو اپ گریڈ کرنے اور ترسیل میں تیزی لانے کے لیے استعمال کی جائے گی۔

انہوں نے بتایا کہ ای کامرس اس وقت خطے میں مجموعی ریٹیل کا 2 سے 2.5 فیصد ہے جبکہ مغربی دنیا اور چین میں 20 سے 22 فیصد ہے، ن ڈاٹ کام متحدہ عرب امارات، سعودی عرب اور مصر میں کام کرتا ہے۔

ای کامرس ویب سائٹ مشرقی وسطیٰ کے دیگر ممالک میں بھی اپنے کاروبار کو وسعت دینے کی کوششیں کررہی ہے۔ نون کے اب روزانہ تقربباً 4 ملین صارفین ہیں۔

محمد العبار نے مزید کہا کہ ہماری سائٹ تیزی سے ترقی کررہی ہے، ہماری توجہ گروسری کی ترسیل پر بھی ہے، نون ڈاٹ کام پر ٹریفک ماہانہ بنیادوں پر بڑھ رہی ہے۔، ہم ہر سال آسانی سے ٹریفک دگنا کر رہے ہیں۔