یونان میں تارکینِ وطن کی ایک اور کشتی خوفناک حادثے کا شکار ہوگئی جس کے نتیجے میں 18 افراد ہلاک ہوگئے۔
یونان میں جنوب مشرقی کریٹ کے ساحل کے قریب کشتی الٹنے سے 18 افراد ہلاک ہوگئے جبکہ دو تارکین وطن کو زندہ بچالیا گیا، امدادی کارروائیاں اب بھی جاری ہیں۔
یونان کے جنوب مشرقی حصے میں واقع جزیرے کریٹ کے قریب کشتی میں کم از کم 20 تارکینِ وطن سوار تھے جو حادثے کے نتیجے میں سمندر میں جا گرے، حکام نے 18 افراد کی ہلاکت کی تصدیق کی ہے۔
یونانی حکام نےبتایا کہ کریٹ جزیرے کے قریب مہاجرین سے بھری ربڑ کی چھوٹی کشتی توازن کھو کر الٹ گئی، حادثے کے شکار افراد کی شناخت کے بارے میں ابھی تک معلوم نہ ہوسکا ہے۔
امدادی کارروائیوں میں یورپی سرحدی ایجنسی فرنٹیکس کا ایک جہاز، ایک طیارہ، ایک ہیلی کاپٹر اور تین تجارتی بحری جہاز شامل ہیں، جو لاشوں اور ممکنہ زندہ بچ جانے والوں کی تلاش میں مصروف ہیں۔
حکام کا کہنا ہے کہ لاشوں کو سرد خانے منتقل کیا جارہا ہے، جہاں شناخت کا عمل مکمل کیا جائے گا۔ ابتدائی معلومات کے مطابق کشتی شمالی افریقہ سے آکر یونانی سمندری حدود میں داخل ہوئی تھی۔
