محققین نے ایک نئی ریسرچ اسٹڈی میں انکشاف کیا ہے کہ تعلیم کے دوران گزرا آپ کا ہر اضافی سال آپ کی موت کے خطرے کو تقریباً 2 فی صد تک کم کر دیتا ہے۔
دی لانسیٹ پبلک ہیلتھ جریدے میں شائع ہونے والے اس تجزیے کے نتائج میں کہا گیا ہے کہ اسکول یا یونیورسٹی میں گزارا جانے والا ہر سال آپ کی متوقع عمر کو بہتر بناتا ہے، جب کہ اسکول نہ جانا اتنا ہی مہلک ہے جتنا کہ سگریٹ نوشی یا الکحل کا استعمال۔
اس اسٹڈی کے محقق کلیئر ہینسن نے کہا کہ اگر آپ پرائمری اسکول، ہائی اسکول اور اس سے آگے تعلیم حاصل کرتے ہیں، تو اس کا اگر اس شخص سے موازنہ کیا جائے جو کبھی اسکول نہیں گیا، تو موت کے خدشے میں اس سے جو کمی آتی ہے وہ اچھی خاصی کمی ہے۔
انھوں نے کہا تصور کریں کہ اگر آپ کے پاس کالج کی ڈگری کے علاوہ ماسٹر کی ڈگری بھی ہے، تو اسکول نہ جانے والے شخص کے مقابلے میں آپ کی موت کے خطرے میں 34 فی صد تک کمی آ سکتی ہے۔ اس بات کی مزید وضاحت کرتے ہوئے انھوں نے کہا ’’آپ 18 سال کی تعلیم کے فوائد کا موازنہ (اپنی خوراک میں) سبزیوں کی مثالی مقدار سے کر سکتے ہیں۔ اس کے برعکس اسکول نہ جانا آپ کی صحت کے لیے اتنا ہی برا ہے جتنا کہ پانچ سال تک روزانہ ایک پیکٹ سگریٹ پینا یا دن میں پانچ سے زیادہ بار شراب نوشی۔ چناں چہ اچھی صحت کے لیے اسکولنگ اتنا ہی طاقت ور عامل ہے جیسا کہ صحت کے خطرناک مذکورہ عوامل طاقت ور ہیں۔‘‘
واضح رہے کہ یہ پہلی منظم تحقیق ہے جو تعلیم کو براہ راست لمبی عمر کے فوائد سے جوڑتی ہے۔ اس تحقیق میں دو بڑے صنعتی ممالک برطانیہ اور امریکا کے ساتھ ساتھ چین اور برازیل جیسے ممالک کے شواہد کا استعمال کرتے ہوئے جائزہ لیا گیا، اور یہ بات سامنے آئی کہ علم کے حصول کے لیے تعلیمی اداروں سے وابستہ بالغوں کی اموات کا خطرہ 2 فی صد کم ہوتا ہے۔
ماہرین کا کہنا ہے کہ یہ نتائج اسکول میں حاضری اور صحت کے درمیان تعلق کو واضح کرتے ہیں، اس سے یہ بھی ظاہر ہوتا ہے کہ اسکول میں زیادہ سال گزار کر نوجوان مزید اعلیٰ تعلیم حاصل کرنے کے لیے مستقبل کی متوقع زندگی میں کئی سالوں کا اضافہ کر سکتے ہیں۔ اس تجزیے سے یہ بات بھی سامنے آئی ہے کہ عمر میں بہتری جنس، سماجی طبقے اور آبادی سے قطع نظر امیر اور غریب ممالک میں یکساں ہے۔
واضح رہے کہ تعلیمی ادارے بہتر سماجی روابط استوار کرنے میں آپ کی مدد کرتے ہیں، اور معلومات تک رسائی اور سمجھنے کی صلاحیت کو بہتر بناتے ہیں، جس سے آپ کو درست انتخاب کرنے میں مدد مل سکتی ہے، یہ آپ کو بااختیار اور قابل قدر محسوس کرنے میں بھی مدد کرتے ہیں۔
