انٹر میامی کے اسٹار فٹبالر اور ارجنٹائن کے عالمی شہرت یافتہ کھلاڑی لیونل میسی کو اکیسویں صدی کا بہترین ایتھلیٹ قرار دے دیا گیا۔
غیر ملکی خبر رساں ایجنسی کے مطابق انٹر میامی کے اسٹار فٹبالر اور ارجنٹائن کے عالمی شہرت یافتہ کھلاڑی لیونل میسی نے اپنے شاندار کیریئر میں ایک اور تاریخی اعزاز اپنے نام کر لیا ہے۔
کینیڈین جریدے نے لیونل میسی کو اکیسویں صدی کا بہترین ایتھلیٹ قرار دے دیا ہے۔
جریدے کی جاری کردہ رینکنگ کے مطابق لیونل میسی نے نہ صرف اپنے روایتی حریف فٹبال لیجنڈ کرسٹیانو رونالڈو کو پیچھے چھوڑ دیا۔ بلکہ این ایف ایل کے عظیم کھلاڑی ٹام بریڈی سمیت دنیا بھر کے کئی بڑے اسپورٹس اسٹارز پر بھی سبقت حاصل کی۔
واضح رہے کہ یہ فہرست مختلف کھیلوں سے تعلق رکھنے والے دنیا کے 25 بااثر ترین ایتھلیٹس پر مشتمل ہے۔ جنہیں ان کی غیر معمولی کامیابیوں، اعزازات اور عالمی اثر و رسوخ کی بنیاد پر منتخب کیا گیا۔
فہرست میں این ایف ایل کے 7 مرتبہ چیمپئن ٹام بریڈی دوسرے نمبر پر موجود ہیں۔ جبکہ اولمپکس میں 28 میڈلز جیتنے والے تاریخ کے کامیاب ترین تیراک مائیکل فیلپس تیسری پوزیشن پر رہے۔
اس فہرست میں ٹینس اسٹار سرینا ولیمز، دنیا کے تیز ترین انسان یوسین بولٹ اور باسکٹ بال سپر اسٹار لیبرون جیمز جیسے نامور کھلاڑی بھی شامل ہیں۔
حیران کن طور پر فٹبال کے ایک اور عظیم کھلاڑی کرسٹیانو رونالڈو اس فہرست میں دسویں نمبر پر رہے۔ جہاں وہ ٹینس اسٹار نوواک جوکووچ، جمناسٹک آئیکون سمون بائلز اور باسکٹ بال لیجنڈ کوبی برائنٹ جیسے کھلاڑیوں سے پیچھے رہے۔
اس اعزاز کے بعد لیونل میسی نے ایک بار پھر خود کو دنیا کے عظیم ترین ایتھلیٹس میں سرفہرست ثابت کر دیا۔
