پنجاب کی سینئر وزیر مریم اورنگزیب نے اعلان کیا ہے کہ اب ڈرائیونگ کی قانونی عمر 16 سال کر دی گئی ہے اور مستقبل میں ای-چالان سسٹم کو مزید سخت بنایا جائے گا۔ انہوں نے کہا کہ صوبے میں ٹریفک ڈسپلن کو بہتر بنانے کے لیے نئے روڈ سیفٹی میکانزم فعال کیے جا رہے ہیں اور خلاف ورزی کرنے والوں کے لیے زیرو ٹالرنس کی پالیسی نافذ رہے گی۔ وزیر کا کہنا تھا کہ جب تک عوام خود ذمہ داری نہیں لیں گے، حادثات میں کمی ممکن نہیں۔
مریم اورنگزیب نے واضح کیا کہ اب ہر ٹریفک خلاف ورزی کا ڈیٹا حقیقی وقت میں مانیٹر کیا جا رہا ہے۔
نابالغ بچوں کو گاڑی چلانے کی اجازت دینا خطرناک ہے اور اگر والدین ایسا کرتے ہیں تو قانون کے مطابق سخت کارروائی ہوگی۔
انہوں نے کہا کہ ہر جان قیمتی ہے اور کسی کو بھی اپنی یا دوسروں کی زندگی خطرے میں ڈالنے کی اجازت نہیں دی جا سکتی۔
سینئر وزیر نے یہ بھی بتایا کہ پنجاب میں منشیات کے خلاف تاریخ کا سب سے سخت آپریشن جاری ہے، جو صرف حکومتی کارروائی نہیں بلکہ ایک سماجی مشن بھی ہے۔
اسکولوں، کالجوں اور یونیورسٹیوں میں خصوصی چیکنگ بڑھا دی گئی ہے اور ڈرگز مافیا کے خلاف کارروائی آخری حد تک جاری رہے گی، جس میں کوئی رعایت نہیں دی جائے گی۔
ان کا کہنا تھا کہ ڈرگ نیٹ ورکس کی میپنگ مکمل ہوچکی ہے، صوبے بھر میں ڈرونز کے ذریعے خفیہ سپلائی پوائنٹس کی نشاندہی کی جارہی ہے، بہت سے فعال گروہ پہلے ہی بے نقاب ہو چکے ہیں، 111 لانگ رینج نیٹ ورکس کی گرفتاری حکومت کے مضبوط عزم کا ثبوت ہے، وزیراعلیٰ نوجوانوں کو نشے سے محفوظ رکھنے کے لیے روزانہ کی بنیاد پر بریفنگ لیتی ہیں۔
