پنجاب بھر میں دفعہ 144 کے نفاذ میں مزید 7 روز کی توسیع کر دی گئی ہے۔ محکمہ داخلہ پنجاب نے نوٹیفکیشن جاری کرتے ہوئے بتایا کہ دفعہ 144 کا نفاذ ہفتہ 22 نومبر تک برقرار رہے گا۔ نوٹیفکیشن کے مطابق صوبے بھر میں احتجاج، جلسے، ریلیاں، دھرنے اور عوامی اجتماعات کی مکمل ممانعت ہوگی۔
دفعہ 144 کے تحت چار یا اس سے زائد افراد کا کسی بھی عوامی مقام پر جمع ہونا ممنوع ہوگا۔
ترجمان نے کہا کہ پنجاب بھر میں ہر قسم کے ہتھیار، لاؤڈ اسپیکر کے غیر مجاز استعمال، اشتعال انگیز، نفرت آمیز یا فرقہ وارانہ مواد کی اشاعت اور تقسیم پر بھی پابندی ہوگی۔
لاؤڈ اسپیکر صرف اذان اور جمعہ کے خطبے کے لیے استعمال کیے جا سکتے ہیں۔
محکمہ داخلہ کا کہنا ہے کہ یہ اقدامات امن و امان کے قیام، انسانی جانوں اور املاک کے تحفظ کے لیے کیے گئے ہیں۔
پنجاب حکومت نے دہشت گردی اور عوامی تحفظ کے خدشات کے پیش نظر یہ ہدایات جاری کی ہیں۔
ترجمان کا کہنا تھا کہ پابندی کا اطلاق شادی کی تقریبات، جنازہ اور تدفین پر نہیں ہوگا جب کہ سرکاری فرائض کی انجام دہی پر موجود افسران و اہلکار اور عدالتیں پابندی سے مستثنیٰ ہیں۔
ترجمان کے مطابق سکیورٹی خطرات کے پیش نظر جلوس اوردھرنا دہشتگردوں کے لیے سافٹ ٹارگٹ ہوسکتاہے، شرپسند عناصرعوامی احتجاج کا فائدہ اٹھا کر ریاست مخالف سرگرمیاں کرسکتے ہیں۔
